![](https://onlinedabali.com/wp-content/uploads/2021/09/nepal-china-boder.jpg)
काठमाडौं । सरकारी अध्ययन टोलीले हुम्लामा चीनले सीमा मिचेको निष्कर्षसहितको प्रतिवेदन बुझाएको छ । नेपाल–चीन सीमामा समस्या रहेको भन्दै संयुक्त निरीक्षण समूह वा विज्ञ समूहमार्फत समाधान खोज्न पनि सुझाव पनि दिएको छ ।
सरकारले गृह मन्त्रालयका सहसचिव जयराज आचार्यको नेतृत्वमा हुम्लाको नाम्खा गाउँपालिकाको लिमी लाप्सादेखि हिल्लासम्मको सीमा क्षेत्रबारे अध्ययन गर्न समिति गठन गरेको थियो । भदौ १६ गते सरकारले अध्ययन समिति गठन गरेको थियो ।
समिति गठन भएको एक महिना नपुग्दै आइतबार प्रतिवेदन गृहमन्त्री बालकृष्ण खाँडलाई बुझाएको छ । समितिले स्थलगत अध्ययन गनुैको साथै सरोकारबालासँग छलफल र सुझाव पनि प्रतिवेदनमा समेटिएको बताइएको छ । त्यस्तै, प्रतिवेदनमा सीमा विवाद भनिएको क्षेत्रको भौगोलिक, समाजिक, सांस्कृतिक, भौतिक पूर्वाधार, सीमाना लगायतको अवस्था समेटिएको छ ।
प्रतिवेदन बुझ्दै गृहमन्त्री खाँणले प्रतिवेदनका सुझावहरु प्राथमिकताका साथ कार्यान्वयन गर्ने बताएका छन् । सरकारले यो प्रतिवेलनको सुझावअनुसार मन्त्रिपरिषदबाट थप समस्या समाधानको पहल गर्ने बताएको छ ।
तर, एक थरीले सरकारले नै चीनसँग विवाद झिक्न अध्ययन समिति गठन गरेको बताउँदै आएका थिए । दार्चुलामा भएको तुइन घटना, दार्चलाकै आकाशमा भारतीय सैनिक विमानको गस्तीलगायतका भारतसँग भएका सीमा विवादलाई विषयान्तर गर्न चीनसँग जबरजस्त विवाद झिकेको बताउँदै आएका थिए ।
हुम्लाबाट प्रतिनिधिसभा सांसद छक्कबहादुर लामाले चीनसँग सीमा समस्या नरहेको बताउँदै आएका छन् । उनले एक कार्यक्रममा हुम्लामा सीमा समस्या पुष्टि भए आफू राजनीतिबाटै सन्यास लिने बताएका थिए ।