काठमाडौं । विघठित (नेकपा)को प्रचण्ड समूहतिर लागेका नेता माधव कुमार नेपाल, झलनाथ खनालसहितका नेताहरु एमालेमै फर्किने निर्णय गरेका छन् । सर्वोच्च अदालतले आइतबार (नेकपा)को एकता खारेज गरेपछि सो समूहको स्थायी समिति बैठक बसेको थियो ।
सोमबार पेरिसडाँडामा बसेको स्थायी कमिटी बैठकले नेता माधवकुमार नेपालसहित पूर्वएमाले नेताहरु एमालेमै फर्किने र प्रचण्डसहित माओवादी केन्द्रका नेताहरुले माओवादी केन्द्र नै ब्यूँताउने निर्णय गरेको छ ।
नेता नेपाल, खनाल प्रचण्ड समूहमा आउँदा सांसद पद नै खोसिने भएपछि एमालेमै फर्किन बाध्य भएका छन् । उनीहरुसँग दल विभाजन गर्न आवश्यक संख्या नपुग्ने भएपछि एमालेमै फर्किने निर्णय गरेका हुन् । एमालेमै फर्किएर अध्यक्ष तथा प्रधानमन्त्री केपी शर्मा ओलीविरुद्ध कडा संघर्ष गर्ने निर्णय समेत गरेको बताइएको छ ।
यसैबीच प्रमुख प्रतिपक्षी नेपाली काँग्रेसले अब ‘अर्ली इलेक्सन’को मुद्दालाई बटमलाइन बनाउने भएको छ । सर्वोच्चको फैसलाबाट नेकपा खारेज भई नेकपा एमाले र माओवादी केन्द्र पूर्ववत अवस्थामा फर्किनुले अर्ली इलेक्सन काँग्रेसको मुख्य मुद्दा बन्न पुगेको हो ।
काँग्रेस नेता रमेश लेखकले काँग्रेसको मुख्य मुद्दा अर्ली इलेक्सन हुनुपर्ने बताए । रातोपाटीसँग उनले भने, ‘अब संसद् त्रिशङ्कु भयो । ६४ प्रतिशत मत भएको पार्टीले पनि स्थिरता दिन सकेन । हिजोबाट त्यो पार्टी विधिवत रूपमा दुई पार्टी भइसक्यो । त्रिशङ्कु संसद्ले न स्थिरता दिन सक्छ न यो प्रतिनिधि सभाले कम्युनिस्टको द्वन्द्वमा काम गर्न सक्छ ।’
