काठमाडाैं । अछामको ढाकारी गाउँपालिका अध्यक्ष धन बहादुर बुढालाई नेपाल कम्युनिष्ट पार्टीका नेता कार्यकर्ताहरुले नियन्त्रणमा लिएका छन् । नेकपाले उनलाई शुक्रबार बिहान करिब १०:१५ बजेतिर सोहि गाउँपालिकाबाटै नियन्त्रण लिएको स्थानीयले बताएका छन् ।
बुढालाई नियन्त्रणमा लिएको स्वीकार गर्दै नेकपाको जिल्ला जनपरिषद् अछामका प्रमुख निरक शाहीले कोरोनाको नाममा भएको भ्रष्टाचार, विकास निर्माणमा भएको अनियमितता र सेवाग्राहीबाट घुस तथा कमिसन लिने गरेको स्थानीयको उजुरीका आधारमा बुझ्न नियन्त्रणमा लिएको जानकारी दिए । बुढा आफूहरुको नियन्त्रणमा सुरक्षित रहेको बताउँदै शाहीले स्थानीयको उजुरीमाथि बुझेर आजै रिहा गर्ने जानकारी समेत दिए ।
नेपाली कांग्रेसबाट चुनाव जितेर गाउँपालिका अध्यक्ष बनेका बुढा आर्थिक लेनदेनका कारण पटकपटक विवादमा आएका व्यक्ति हुन । यता नेपाल कम्युनिष्ट अछामले बुढा आफ्नो कब्जामा रहेको पुष्टि गरेको छ ।
यसअघि पनि नेकपाले अछाममा गरिब जनतासंग महँगोमा ब्याज अशुल्ने एक सहकारीका प्रतिनिधिलाई नियन्त्रणमा लिएर छोडेको थियो ।
