काठमाडौं । कर्णाली प्रदेशको मन्त्रिपरिषद् पुनर्गठन रोकिएको छ । मुख्यमन्त्री महेन्द्रबहादुर शाहीले मन्त्रिपरिषद् पुनगर्ठनको तयारी गरेपनि आइतबार हुन सकेन । मुख्यमन्त्री शाहीले मन्त्रिमण्डल पुनर्गठन गर्न लागेको संचारमाध्यमहरुमा समाचार सार्वजनिक भएको थियो ।
मुख्यमन्त्री शाहीविरुद्ध आफ्नै पार्टीका नेताहरुले अविश्वास प्रस्ताव ल्याएपछि विवाद उत्कर्षमा पुगेको थियो । कर्णालीमा पार्टी अध्यक्ष तथा प्रधानमन्त्री केपी शर्मा ओली पक्षधर नेताहरुले मुख्यमन्त्री शाहीविरुद्ध अविश्वासको प्रस्ताव ल्याएको बताइएको छ । वरिष्ठ नेता माधव कुमार नेपाल पक्षधर सांसदहरुले पछि हटेसँगै अविश्वास प्रस्ताव असफल भएको थियो ।
कर्णालीको विवाद मिलाउन मुख्यमन्त्रीसहित दुबै पक्षधर नेताहरुलाई काठमाडौं बोलाउँदा पनि विवाद समाधान हुन सकेको थिएन । प्रधानमन्त्री ओलीले प्रदेश सरकार केन्द्रकै अंग भएकोले आफैले निर्णय गर्न नसक्ने भन्दै मुख्यमन्त्री शाहीलाई प्रमुख सचेतकबारे लिइएको निर्णय फिर्ता लिन निर्देशन दिएका थिए । यो पछि झन् विवाद बढेको थियो ।
केन्द्रमा विवाद समाधान नभएपछि मुख्यमन्त्री शाहीले मन्त्रिपरिषद् पुनर्गठनको तयारी गरेको बताइएको छ । आइतबार नै मन्त्रिपरिषद् पुनर्गठनको तयारी थालिएको समाचार सार्वजनिक भएको थियो ।
प्रधानमन्त्री ओली निकट मानिएका सामाजिक विकास मन्त्री दल रावल र नन्दसिंह बुढालाई हटाएर नेता नेपाल निकट नेताहरुलाई मन्त्रीमा नियुक्त गर्ने हल्ला चलेको थियो । तर मन्त्री रावलले आफूले मुख्यमन्त्री शाहीलाई सहयोग गर्नुको साथै उत्कृष्ठ कार्य सम्पादन गरेको कारण राजिनामा नदिने बताएका थिए ।
पार्टीका कार्यकारी अध्यक्ष प्रचण्डले रोक्न भनेपछि मुख्यमन्त्री शाहीले आइतबार मन्त्रिपरिषद् पुनर्गठन रोकिएको बताइएको छ ।
