काठमाडौं । आज नेपालमा संविधानसभाबाट संविधान जारी भएको दिन । दोस्रो संविधानसभाबाट संविधान जारी भएको आज पाँच वर्ष पूरा गरी ६ वर्षमा लागेको छ । यसको अवसरमा सरकारले संविधान दिवस मनाउँदै आएको छ ।
संघीय संरचनासहितको संविधान जारी भएपछि नेपालमा तीन तहका सरकार छन् । सरकारले यो वर्ष पनि टुँडिखेलमा संविधान दिवस मनाउने तयारी गरेको छ । सरकारले संविधान जारी भएको स्मरण गर्दै राष्ट्रिय दिवसको रुपमा मनाउन गरेको छ । यो कोरोनाका कारण विगतमा जस्तो विशेष कार्यक्रम नभएपनि दिउँसो सैनिक मञ्च टुँडिखेलमा संक्षिप्त विशेष समारोह आयोजना गरिएको छ ।
संविधान दिवसको अबसरमा राष्ट्रपति भण्डारी, उपराष्ट्रपति नन्दबहादुर पुन, प्रधानमन्त्री केपी शर्मा ओली, प्रधानन्यायाधीश चोलेन्द्रशमशेर राणा, प्रतिनिधि सभाका सभामुख अग्निप्रसाद सापकोटा र राष्ट्रिय सभाका अध्यक्ष गणेशप्रसाद तिमिल्सिना मात्रै सहभागी हुने बताइएको छ । समारोहबाट प्रधानमन्त्री ओलीले संविधान दिवसको शुभकामना सन्देशसहित देशवासीका नाममा सम्बोधन गर्ने तयारी भइरहेको छ ।
कोरोना संक्रमणको जोखिमका कारण सीमित सहभागीतामा संविधान दिवस मनाउन लागिएको हो । अघिल्ला वर्षहरुमा मन्त्री, सांसद, कुटनीतिक नियोगका प्रतिनिधि, कर्मचारी, कलाकारलगायत पनि सहभागी हुने गरे पनि यस वर्ष उनीहरुलाई समारोहमा बोलाइएको छैन ।
त्यसैगरी संविधानले सबै क्षेत्र र वर्गका समुदायको भावनाको प्रतिनिधित्व नगरेको भन्दै संविधानको विरोध पनि हुँदै आएको छ । जनताले बगाएको रगत र पसिनालाई संविधानले सम्बोधन गर्न नसकेको र संविधानले पुरानै संसदीय व्यवस्थालाई मान्यता दिएको भन्दै केही राजनीतिक पार्टी र समुदायले आज कालो दिनको रुपमा मनाउँदै आएका छन् ।
जनयुद्ध र जनआन्दोलनको मर्मअनुसार संविधान नबनेको, संविधानले सबै दलाल संसदीय व्यवस्थालाई झन् बलियो मात्रै बनाएको भन्दै विप्लव नेतृत्वको नेपाल कम्युनिस्ट पार्टी, वैद्य नेतृत्वको क्रान्तिकारी माओवादी र मधेसवादी पार्टीहरुले विरोध गर्दै आएका छन् । उनीहरुले यसअघि असोज ३ गतेलाई कालो दिनको रुपमा मनाउँदै आएका थिए तर यस वर्ष कोरोनाका कारण सांकेतिक रुपमा विरोध जनाएका छन् नेकपाले त आफ्नो छुट्टै संविधान जारी गर्दै समानान्तर सत्ताको अभ्यास गरिरहेको छ ।
त्यसैगरी आदिवासी जनजाती र थारु समुदायले पनि संविधानले आफूहरुको अधिकारी सुनिश्चित नगरेको भन्दै कालो दिनको रुपमा मनाउँदै आएका छन् ।
