काठमाडौं । नेपाल कम्युनिस्ट पार्टी (नेकपा)का अध्यक्ष प्रचण्डले अनसन बस्ने घोषणा गरेका छन् । उनले मधेसमा सडक तथा पूर्वाधार निर्माणका सवालमा भइरहेको ढिलाईविरुद्ध आफैं अनसनमा बस्ने चेतावनीमूलक घोषणा गरेका हुन् ।
महोत्तरीको पिपरा गाउँपालिकाको अध्यक्ष चयनका लागि हुने निर्वाचन केन्द्रित भएर नेकपाले बुधबार पिपरामा छठ पर्वको अवसरमा एउटा कार्यक्रम आयोजना गरेको थियो । सोही कार्यक्रममा बोल्दै प्रचण्डले जनकपुर–पिपरा–जलेश्वर–भित्तामोड जोड्ने सडक निर्माणको कार्यलाई तिव्रता दिन भौतिक पूर्वाधार तथा यातायात मन्त्री र प्रधानमन्त्रीसँग समेत कुराकानी गर्ने पनि बताए ।
प्रचण्डले उक्त सडकको लागि आफू प्रधानमन्त्री भएको बेला ठाडो आदेशमार्फत १ अर्ब रुपैयाँ विनियोजन गर्न लगाएको समेत बताए । उक्त सडक निर्माणमा विलम्ब हुने, ठेक्का प्रक्रिया छिटो नटुंगिए आफू नै अनसनमा बस्ने पनि प्रचण्डले चेतावनी दिए ।
आगामी मंसिर १४ मा पिपरा गाउँपालिकाको अध्यक्ष चयनका लागि हुने उपनिर्वाचनमा आफ्नो पार्टी नेकपालाई मतदान गर्न अनुरोध गरेका प्रचण्डले आफ्नो मधेससँगको प्रेम नटुटेको बताए ।
अध्यक्ष प्रचण्डले बुधबार महोत्तरीको पिपरामा आयोजित एक कार्यक्रममा बोल्दै सडक लगायतका पूर्वाधार निर्माणका विषयमा सरकार गम्भीर रहेको पनि बताए । पूर्वप्रधानमन्त्री र सत्तारुढ पार्टीकै अध्यक्षले ढिला सुस्तीविरुद्ध अनसन बस्ने घोषणाले सरकारको कामकारवाही कस्तो छ भन्ने देखाएको छ ।
