बुद्धशरण शाही
काठमाडौं । काठमाडौं महानगरपालिका-२७ ले नवयुवाको सीप अभिवृद्धि तथा रोजगारी उन्मुख बनाउने उद्देश्यले विभिन्न प्रविधिमैत्री तालिम सञ्चालन गरेको थियो । ‘ग्राफिक डिजाइन, डिजिटल मार्केटिङ, डेभप्स र एआइ फर एभ्रिवन’ विषयमा सञ्चालन गरिएको उक्त तालिमका सहभागीलाई शनिबार आयोजित समापन कार्यक्रममा प्रमाणपत्र वितरण गरिएको हो ।
समापन समारोहलाई सम्बोधन गर्दै वडा नं. २७ का अध्यक्ष योगेशकुमार खड्गीले वर्तमान समय प्रविधिको युग भएकाले युवालाई सोहीअनुसारको सीप प्रदान गर्न आवश्यक रहेको बताए । उनले वडाले तालिम प्रदान गरेर मात्रै नछाड्ने, तालिमप्राप्त युवाहरूलाई पुनः समेट्दै तालिमको प्रभावकारिता, व्यवहारिक उपयोगिता तथा आगामी आवश्यकताबारे छलफल गर्ने योजना रहेको समेत जानकारी दिए ।
साथै, वडाले युवा मात्र नभई विभिन्न उमेर समूहका नागरिकलाई लक्षित गरी विविध तालिम सञ्चालन गर्दै आएको र कपाल काट्ने तालिमलाई सीटीईभीटी बाट मान्यता दिलाउने प्रयास भइरहेको खड्गीको भनाइ थियो ।
वडा सदस्य तथा तालिम संयोजक सृष्टि कंसाकरले युवालाई प्रविधिमैत्री बनाउँदै व्यवहारिक सीपमार्फत रोजगारीको अवसर सिर्जना गर्ने उद्देश्यले तालिम सञ्चालन गरिएको बताए । डिजिटल क्षेत्रमा प्रशस्त अवसर भए पनि तालिमको अभावले पहुँच कठिन हुने अवस्थालाई न्यूनीकरण गर्ने लक्ष्यसहित कार्यक्रम अघि बढाइएको उनको भनाइ थियो ।
कार्यक्रममा ‘एआइ फर एभ्रिवन’ का प्रशिक्षक उदितकुमार महतोले स्थानीय सरकारले युवाको आवश्यकता पहिचान गरी सीपमूलक तालिम सञ्चालन गर्नु सकारात्मक पहल भएको उल्लेख गर्दै यसले नागरिकप्रति जनप्रतिनिधिको जवाफदेहिता झल्काउने बताए ।
तालिमका सहभागीहरू बरदा तुलाधर, दीपा पण्डित र अदिश्री श्रेष्ठले तालिमबाट प्राप्त ज्ञान तथा अनुभव उपयोगी भएको बताउँदै आफ्नो रुचिअनुसारको तालिम उपलब्ध गराएकोमा वडा कार्यालयप्रति आभार व्यक्त गरेका थिए ।
वडाका अनुसार ग्राफिक डिजाइनमा १६ जना, डिजिटल मार्केटिङमा २१ जना, एआइ फर एभ्रिवनमा १८ जना र डेभप्समा ६ जना गरी कुल ६१ जनाले तालिम लिएका थिए । समापन कार्यक्रममा वडा सदस्यहरू दिनेश श्रेष्ठ, धर्म प्रजापति, प्रभा श्रेष्ठलगायत प्रशिक्षार्थीका अभिभावकको उल्लेख्य उपस्थिति रहेको थियो ।
