अनलाइन डबली
विराटनगर । आसन्न प्रतिनिधिसभाको निर्वाचनलाई लक्षित गर्दै नेपाली सेनाले कोशी प्रदेशभर उच्च सतर्कता अपनाएको छ । श्री पूर्वी पृतना हेडक्वाटर अन्तर्गत प्रदेशका सम्पूर्ण १४ जिल्लामा १२० स्थानमा बम डिस्पोजल टोली तैनाथ गरिएको जनाइएको छ ।
यसैक्रममा विराटनगर महानगरपालिका–७ डाँफे चोकमा मंगलबार बिहान कालो प्लास्टिकको पोकाभित्र शङ्कास्पद वस्तु रहेको सूचना प्राप्त भएको थियो । सूचनापछि नेपाली सेनाको विराटनगर विमानस्थलमा तैनाथ बम डिस्पोजल टोलीसहितको फौज तत्काल परिचालन गरिएको थियो ।
संयुक्त रूपमा क्षेत्रलाई सुरक्षित बनाउँदै शङ्कास्पद वस्तुलाई निष्क्रिय गरिएको पूर्वी पृतना हेडक्वार्टरकी जनसम्पर्क तथा सूचना अधिकृत सहसेनानी सुश्मा सुब्बाले जानकारी दिएकी छिन् ।
त्यसैगरी कोशी प्रदेशकै ताप्लेजुङ जिल्ला आठराई त्रिवेणी गाउँपालिका–३ पञ्चमीस्थित हाङपाङ–दोभान भित्री कच्ची सडक खण्डमा बिहान कालो टेपले बेरिएको अर्को शङ्कास्पद वस्तु फेला परेको सूचना प्राप्त भएको थियो ।
लगत्तै हाङपाङ सुरक्षा बेसमा तैनाथ बम डिस्पोजल टिमसहितको फौज परिचालन गरिएको थियो । उक्त वस्तुलाई पनि सुरक्षित रूपमा निष्क्रिय गरिएको सेनाले जनाएको छ ।
दुवै स्थानमा फेला परेका शङ्कास्पद वस्तु समयमै निष्क्रिय गरिएकाले कुनै मानवीय वा भौतिक क्षति नभएको सेनाले स्पष्ट पारिएको छ ।
सेनाले निर्वाचन अवधिभर विशेष निगरानी र उच्च सतर्कता कायम राखिएको उल्लेख गर्दै कुनै पनि स्थानमा शङ्कास्पद वस्तु देखिए वा फेला परेमा नजिकैका सुरक्षा निकायलाई तुरुन्त जानकारी गराउन सर्वसाधारणमा अपिल गरेको छ ।
