अनलाइन डबली
काठमाडौँ । अन्तरिम सरकारको मन्त्रीको शपथ लिने तयारी रहेका अभियान्ताको नामबाट चिनिएका खगेन्द्र सुनारविरुद्ध बहुविवाहको मुद्दा पनि रहेको खुलासा भएको छ ।
सुनारले आफू श्रीमति हुँदाहुँदै अर्की ल्याएको भन्दै जेठी श्रीमतिले नै मुद्दा दिएको खुलासा भएको छ ।
अदालतमा रहेको विवरणअनुसार जेठी श्रीमतिले २०७९।०६।०५ गते गिता खत्रीलाई बिबाह गरी बबुविवाह गरेकोले कानुनअनुसार कारवाही गरिपाउँदै भन्दै जाहेरी दिएकी छन् ।
यसअघि जिल्ला अदालत सुर्खेतबाट पनि पक्राउ पुर्जी जारी भएको अनलाइन डबलीले सार्वजनिक गरेको थियो । त्यस्तै, काभ्रेबाट साइबर अपराधसम्बन्धी मुद्दा पनि विचाराधिन अवस्थामा रहेको भेटिएको छ ।
सामाजिक संजाल प्रयाेगकर्ताहरूले सुनारविरुद्ध २३ वटा मुद्दा रहेको लेखेका छन् ।
केन्द्रीय प्रहरीको क्रिमिनल रेकर्ड सिस्टम (सीआरएस)ले पनि सुनार दुईवटा मुद्दामा फरार अभियुक्त रहेको देखाएको छ । दुईवटा अभियोगमा कैद भुक्तान गर्न बाँकी रहेकै बेला अन्तरिम सरकारकी प्रधानमन्त्री सुशीला कार्कीले मन्त्रीको सिफारिस गरेकी हुन् ।
स्रोतका अनुसार संचारमाध्यममा सुनार अभियुक्त भएको सार्वजनिक भएसँगै प्रधानमन्त्री कार्कीले मन्त्रीको सुचीबाट हटाउनेबारे सल्लाहकारसँग छलफल गरेकी छन् । सुनारलाई मन्त्री नियुक्त गर्दा थप विवादमा आउने भएकोले उनको शपथ आज नगर्ने कि भन्नेबारे छलफल भएको बताइएको छ ।
स्राेतका अनुसार सुनारकाे नाम मन्त्रीकाे सूचीबाट तत्काललाइ हटाइएकाे छ । अाज सुनारकाे शपथ नहुने भएकाे छ ।
