अनलाइन डबली
काठमाडाैँ । नेकपा एमालेले रोक्न खोज्दा पनि पूर्वराष्ट्रपति विद्यादेवी भण्डारीले आफ्नो राजनीतिक अभियानलाई जारी राखेकी छन् । भण्डारीलाई नेता कार्यकर्ताबीच जान राेक्न एमाले असफल भएकाे छ ।
वीरगञ्ज उद्योग वाणिज्य सङ्घद्वारा आयोजित ‘वृहत् महिला सम्मेलन–२०८२’ मा प्रमुख अतिथिका रूपमा सहभागी हुन शनिवार काठमाडौँबाट सिमरा विमानस्थल भण्डारीको भव्य स्वागत गरियो ।
एमालेका मधेसका नेता कार्यकर्ताहरुले भण्डारीलाई ५१ किलोको फुलको मालाले स्वागत गरेका छन् ।
भण्डारी सहभागी हुने कार्यक्रममा एमालेले नेता कार्यकर्तालाई जान रोक लगाएपनि केन्द्रीय नेताहरुले ५१ किलो फुलको मालाले स्वागत गरेका हुन् । भण्डारीको स्वागतमा एमाले स्थायी कमिटी सदस्य मुकुन्द न्यौपाने, पोलिटब्युरो सदस्य पुरुषोत्तम पौडेल, केन्द्रीय सदस्यहरू केदार न्यौपाने, अरविन्द सिंह, प्रदेश सचिव मनोज पौडेल, सचिवालय सदस्य जयप्रकाश थारुलगायतका नेताहरु विमानस्थलमा पुगेका थिए ।
पोलिटब्युरो सदस्य तथा पूर्वमन्त्री पुरुषोत्तम पौडेलले भण्डारीलाई ‘गणतन्त्रको गौरव’ भन्दै स्वागत र सम्मान गरिएको बताए ।
उनले भण्डारीको राष्ट्रपति कार्यकाल र एमाले नेतृत्वमा रहँदा खेलेको भूमिकाको प्रशंसा समेत गरे । पार्टी नेतृत्वले भण्डारीलाई औपचारिक कार्यक्रममा सहभागी नहुन निर्देशन दिएको भए पनि नेता–कार्यकर्ता स्वागतमा सिमरा पुगेका हुन् ।
