अनलाइन डबली
काठमाडौँ । सक्रिय राजनीतिमा आउन ब्रेक लगाएपनि पूर्वराष्ट्र विद्यादेवि भण्डारीको पक्षमा नेता कार्यकर्तामाथि नेकपा एमालेले कारवाहीको डण्डा चलाउन थालेको छ । शुक्रबार पत्रकार सम्मेलन गरेर भण्डारीले आफ्नो पार्टी सदस्यता कसैले खान नसक्ने चेतावनी दिएकी थिइन् । भण्डारीको यो भनाईसँगै एमाले नेतृत्व थप चिढिएको छ ।
आफूलाई मदन भण्डारीले सदस्यता दिएको भन्दै भण्डारीले सक्रिय राजनीतिमा फर्किन कसैले रोक्न नसक्ने स्पष्ट सन्देश दिएकी थिइन् ।
भण्डारीको पत्रकार सम्मेलनमा सहभागी भएका एक युवा नेतालाई एमालेले कारवाही गरेको छ । एमालेको युवा संगठन नेपाल युवा सङ्घले लुम्बिनी प्रदेशका अध्यक्ष सुरज खरेललाई निलम्बन गरेको छ । सङ्गठनको गरिमा र अनुशासनमा आँच पुर्याउने काम गरेको भन्दै उनलाई निलम्बन गरिएको हो ।
महासचिव महेश चौलागाईले जारी गरेको पत्रमा पछिल्लो समय सङ्गठनमा प्राप्त जानकारी, उजुरी तथा प्रमाणका आधारमा तपाईंको गतिविधिबाट सङ्गठनको गरिमा र अनुशासनमा आँच पुगेको देखिएको उल्लेख छ । यस सम्बन्धमा सङ्घको केन्द्रीय कमिटीको दोस्रो पूर्ण बैठकको निर्णयअनुसार तपाईँलाई मिति २०८२ असार २५ गते स्पष्टीकरण सोधिएको समेत बताइएको छ ।
यसैगरी एमालेले भण्डारीको पक्षमा नलाग्न मातहतका सदस्यताहरुलाई मौखिक सर्कुलर नै जारी गरेको बताइएको छ ।
केन्द्रीय समिति बैठकमा स्थायी समिति सदस्य कर्णबहादुर थापालाइ पार्टी अध्यक्ष केपी शर्मा ओलीले कारवाही गर्ने चेतावनी दिएका थिए । भण्डारीको सदस्यता खोस्न वा राजनीतिमा रोक्न नहुने थापाले बताएका थिए ।
