अनलाइन डबली
काठमाडौँ । रबि लामिछानेविरुद्ध तीनवटा मुद्दा दर्ता भएका छन् । सरकारी वकिल कार्यालयले कास्की जिल्ला अदालतमा ३ वटा कसुरमा मुद्दा दर्ता गरेको हो ।
जिल्ला सरकारी वकिल कार्यालयका अनुसार लामिछानेविरुद्ध सङ्गठित अपराध, सहकारी ठगी र सम्पत्ति शुद्धीकरण सम्बन्धी कसुरमा अभियोग पत्र दर्ता भएको छ ।
पूर्व डीआईजी छविलाल जोशी पक्राउ परेको दिनबाट ९२ औँ दिनमा सरकारले लामिछाने र जोशी सहित ४४ जनालाई प्रतिवादी बनाएर मुद्दा दायर गरेको हो ।
प्रहरीले ५१ जनालाई प्रतिवादी कायम गर्न सरकारी वकिललाई राय दिएको थियो । लामिछाने सहित ४९ जनालाई सम्पत्ति शुद्धीकरण, सहकारी ठगी र सङ्गठित अपराध गरेको कसुरमा तथा जीवी राई र लीला पछाईंलाई राष्ट्रबैंक ऐन अन्तर्गतको कसुरमा पनि सजाय गर्न मागदावी लिनुपर्ने राय दिएको थियो । तर, सरकारी वकिलले प्रतिवादीको संख्या घटाएर मुद्दा दायर गरेको छ ।
सूर्यदर्शन सहकारीबाट लामिछाने र जीवी राईसहितको समूहले १ अर्ब ५१ करोड अपचलन गरेको प्रहरीको अनुसन्धान निष्कर्ष छ । जसमध्ये सुर्यदर्शनको ५ करोड ४८ लाख निक्षेप गोरखा मिडिया नेटवर्क प्रालिमा लगेर अपचलन गरेको प्रहरीको दाबी छ ।
त्यसैगरी सरकारी वकिल कार्यालयले र्यदर्शन सहकारीको रकम अपचलनसम्बन्धी मुद्दामा रवि लामिछाने पत्नी निकिता पौडेललाई पनि प्रतिवादी बनाएको छ । पौडेललाई सम्पत्ति जफत गर्ने प्रयोजनको लागि प्रतिवादी बनाएर कास्की जिल्ला अदालतमा मुद्दा दायर गरिएको हो ।
