अनलाइन डबली
काठमाडौं । नेकपा (माओवादी केन्द्र) का अध्यक्ष प्रचण्डले स्थायी समिति बैठकले पार्टी फुटको हल्लालाई खारेज गरिसकेको बताएका छन् ।
बुधबार बागमती प्रदेशको परामर्श बैठकमा बोल्दै प्रचण्डले मिडिया ट्रायल नगर्न समेत नेताहरुलाई चेतावनी दिए ।
अध्यक्ष प्रचण्डले बैठकमा भएका छलफल र बहस बाहिर मिडियामा नलैजान नेताहरुलाई सचेत गराएका थिए ।
केही संचारमाध्यमहरुले उपमहासचिव जनार्दन शर्मा ‘प्रभाकर’ ले पार्टी फुटाउन लागेको समाचार प्रकाशित गरेका थिए । तर, पदाधिकारी र स्थायी समिति बैठकमा प्रभाकरले पार्टीभित्र आफूलाई लागेको विषयमा राखेको तर पार्टी फुटाउनेबारे नसोको बताइसका थिए ।
बैठकमा प्रभाकरले लिखित प्रस्ताव नै पेश गरेर आफू माओवादी आन्दोलन र पार्टीलाई कसरी बलियो बनाउन सकिन्छ भन्नेमा चिन्ताका साथ विषय उठाएको बताएका थिए ।
साउन २५ गतेदेखि ३१ गतेसम्म चलेको स्थायी समिति बैठकले केन्द्रीय समिति बैठकअघि सबै प्रदेशमा परामर्श बैठक गर्ने निर्णय गरेको थियो । सोहीअनुसार आजबाट परामर्श समितिको बैठक बस्न सुरु गरेको हो । आज पहिलो दिन बागमती प्रदेशको बैठक सुरु भएको छ । बैठक भोलिसम्म चल्नेछ ।
