अनलाइन डबली
काठमाडौँ । फ्रान्सको संसदीय चुनावमा वामपन्थी गठबन्धनले दक्षिणपन्थी गठबन्धनलाई पछि पार्दै जित हात पारेकाे छ । न्यू पपुलर फ्रन्टका नेता जीन लुक मेलेन्सनकाे नेतृत्वकाे गठबन्धनले सरकार बनाउन तयारी गरेकाे छ ।
आइतबार भएको दोस्रो र अन्तिम चरणको निर्वाचनमा नयाँ पपुलर फ्रन्टले १८२ सिटमा अग्रता लिएको छ र आगामी सरकारमा ठूलो भूमिका खेल्ने भएको छ । मेलेन्चोनले आगामी प्रधानमन्त्री नयाँ पपुलर फ्रन्टबाट हुने बताए ।
एक साताअघि भएको पहिलो चरणको निर्वाचनमा चरम दक्षिणपन्थी दल नेशनल र्याली बहुमततर्फ अघि बढेपनि गत आइतबार भएको दोस्रो र अन्तिम चरणमा भने तेस्रो स्थानमा झरेको थियो ।
राष्ट्रपति म्याक्रोनको केन्द्रवादी गठबन्धन दोस्रो स्थानमा आयो ।
फ्रान्सको संसदीय निर्वाचनको नतिजा सार्वजनिक भएपछि राजधानी पेरिसका केही स्थानमा हिंसात्मक प्रदर्शन भएको छ । उता वामपन्थी समर्थकहरुले आइतबार रातिदेखि पेरिसको सडकमा ठूलो संख्यामा विजयी जुलुस निकालेका छन् ।
यसैबीच वामपन्थी गठबन्धनले युक्रेन र प्यालेस्टाइनबारे नयाँ निर्णय लिने बताइएकाे छ । नेता मेलेन्चोनले प्यालेस्टाइनी राज्यलाई मान्यता दिने बताएका छन् ।
हालै चार युरोपेली देश स्पेन, नर्वे, आयरल्याण्ड र स्लोभेनियाले प्यालेस्टिनी राज्यलाई मान्यता दिएका छन् ।
