अनलाइन डबली
काठमाडौँ । रुसले क्रिमिया र रुसका केही क्षेत्रमा युक्रेनले गरेको ठूलो आक्रमणलाई असफल बनाएको बताएको छ ।
युक्रेनले अमेरिकालगायत पश्चिमा देशहरुले दिएका सयभन्दा बढी ड्रोन र ६ वटा मानवरहित डुङ्गा रुसी सीमा क्षेत्रमा प्रहार गरेको थियो । उक्त हमलाको क्रममा प्रहार गरिएका सबै ड्रोन रुसी सेनाले एयर डिफेन्स सिस्टमार्फत नष्ट गरेको बताइएको छ ।
युक्रेनले सबैभन्दा ठूलो हमला दक्षिणी रुसको क्रास्नोडार क्षेत्रमा गरेको थियो । अन्तर्राष्ट्रिय संचारमाध्यमहरुका अनुसार अनलाइन पोस्ट गरिएको भिडियोले क्षेत्रको येइस्कमा रहेको सैन्य एयर बेस नजिकै आगलागी देखाएको छ ।
क्रास्नोडार अधिकारीहरूले सैन्य अड्डा नजिकैका घटनाहरूबारे टिप्पणी गरेका छैनन् तर इल्स्की नजिकैको तेल रिफाइनरीको प्रशासनिक भवनहरूमा आगलागी भएको बताएका छन्।
अधिकारीहरुका अनुसार आगो निभाइएको छ भने घटनामा दुई जना घाइते भएका छन् । स्थानीय गभर्नरका अनुसार क्रास्नोडार सहरमा भग्नावशेषबाट खसेर एक जनाको मृत्यु भएको छ ।
युक्रेनले अमेरिका दिएको ड्रोनसहित ठूलो हमला गरेपनि लक्षित सफलता प्राप्त गर्न नसकेको रुसी अधिकारीले दाबी गरेका छन् ।
