अनलाइन डबली
काठमाडौँ । मकवानपुरको ऋषेश्वर सामुदायीक वनका पदाधिकारीविरुद्ध अख्तियार दुरुपयोग अनुसन्धान आयोगमा उजुरी परेको छ । बकैया गाउँपालिकास्थित उक्त वनमा विगत लामो समयदेखि समितिका पदाधिकारीकै अगुवाईमा अबैध फडानी गरिरहेको भन्दै स्थानीय युवाहरुले अख्तियारमा उजुरी दिएका हुन् ।
अख्तियार स्रोतका अनुसार समितिका अध्यक्ष नरबहादुर बास्कोटासहित वर्तमान र पूर्व पदाधिकारीसँगै स्थानीय जनप्रतिनिधिविरुद्ध उजुरी परेको हो । उजुरीमा २०६६ सालदेखि हालसम्म वनका कर्मचारीसँगको मिलेमतोमा समितिका पदाधिकारीहरुले आफ्नो स्वार्थ पूरा गर्न अवैधरुपमा वन फडानी गरिरहेको उल्लेख छ ।
उजुरीमा मानबहादुर मोक्तान (२०६६ सालको उपभोक्ता वन समिति अध्यक्ष, आइतमान जिम्बा (२०७७/०७८ सालका अध्यक्ष), नरबहादुर बास्कोटा (हालका अध्यक्ष), दुर्गाबहादुर स्याङ्तान (सचिव), कुन्साङ मोक्तान (श्रीमति समिति सदस्य), तोकबहादुर स्याङ्तान (ठेकेदार तथा लगानीकर्ता) र जनप्रतिनिधि (वडा सदस्य) गणेश लामामाथि छानविन गरी कारवाहीको माग गरिएको छ ।
अध्यक्ष बास्कोटाले वन डिभिजन कार्यालयबाट ल्याएको कटानी सहमतिभन्दा धेरै काठ काट्दै आएको उजुरीमा उल्लेख छ । काठ तस्करसँगै काठमाडौँबाट भाडाका गुण्डाहरु लिएर स्थानीयलाई गाउँ प्रवेशमा रोक लगाएर कटानी गरिरहेको स्थानीयले बताएका छन् ।
समितिका पदाधिारीहरुले माओवादी नेतामाथि हतियार प्रहार गरेपछि पक्राउ परी जेल जीवन बिताएका चोरबाबु भनिने गुण्डा नाइके बाबु लामालाई बोलाएर स्थानीयलाई धम्काउन लगाएको आरोप छ । लामाको नाम लिएर समितिका पदाधिकारीले नै स्थानीयलाई धम्काइरहेको आरोप छ ।
