अनलाइन डबली
काठमाडौँ । इरानले एकैपटक २ सयभन्दा धेरै मिसाइल, ड्रोनबाट इजरायलमाथि हमला गर्यो । यसले इरान र इजरायलबीच युद्ध हुन्छ भन्ने विश्लेषण गरिएको थियो । तर, इजरायलले तत्काल कुनै जवाफ कारवाही नगर्ने संकेत गरेसँगै तत्काल युद्ध टरेको छ ।
इरानले सिरियामा रहेको आफ्नो कुटनीतिक नियोगमाथि इजरायलले गरेको हमलाको बदलामा हमला गरेको बताउँदै जवाफ फर्काए अकल्पनिय हमला गर्ने चेतावनी दिएको थियो । इरान र इजरायलबीचको दुश्मनी लामो भएपनि इरानले आफ्नो भूमिबाट सिधै हमला पहिलो पटक गरेको थियो ।
इरानी सेनाका प्रमुख मेजर जेनरल मोहम्मद बघेरीले आफ्नो अप्रेसन सकिएको र थप हमला नगर्ने तर इजरायले प्रतिक्रिया जनाएको खण्डमा अझ ठूलो कारवाही गर्ने चेतावनी दिएका थिए । उनले जवाफी कारवाहीको लागि आफूहरु तयार रहेको बताएका थिए ।
इजरायललाई साथ दिए अमेरिकामाथि हमला गर्ने इरानले चेतावनी दिएको छ । हमलालाई रोक्न इजरायललाई सहयोग गरेको अमेरिकी राष्ट्रपति जो बाइडनले जनाएलगत्तै इरानले थप सहयोग गरे अमेरिकी सैन्य क्याम्पमाथि हमला गर्ने इरानले चेतावनी दिएको थियो ।
इरानको चेतावनीपछि राष्ट्रपति बाइडनले इजरायली प्रधानमन्त्री बेन्जामिन नेतान्याहूलाई फोन गरेर इरानमाथि हमला गर्न सहयोग नगर्ने जानकारी गराएका थिए । बाइडनको यही फोनले नै इजरायललाई जवाफ फर्काउन झट्का लगयो ।
हमाससँगको लडाइँमा त अमेरिकाको साथ र सहयोगको अपेक्षा गर्ने इजरायलले बाइडनले यस्तो बताएपछि इरानमाथि जवाफी हमला गर्ने हिम्मत गर्न सकेन । उसले यथोचित समयमा मूल्य चुक्ता गर्ने बतायो । तर, जवाफी कारवाही गर्ने हिम्मत गरेन ।
संयुक्त राष्ट्रसङ्घस्थित इरानी प्रतिनिधिमण्डलले राष्ट्रसङ्घीय बडापत्रको आत्मरक्षासम्बन्धी धारा ५१ मा उल्लिखित प्रावधानलाई उद्धृत इजरेलमा शृङ्खलाबद्ध हमला गरेपछि यो विषय टुङ्गिएको जनाएको थियो । इरानले इजरेललाई फेरि अर्को गल्ती नगर्न चेतावनी दिएको छ ।
इरानको चेतावनीपछि अमेरिका पछि हट्नु र इजरायलले जवाफ फर्काउने हिम्मत नगरेसँगै सम्भावित युद्धको खतरा तत्काललाई टरेको विश्लेषकहरुले बताएका छन् ।
