अनलाइन डबली
काठमाडौँ । रुसी फेडेरेशनको नयाँ राष्ट्रपतिको लागि भएको चुनावमा युक्रेनको जपोरिजिया, खेअरसन, डोनेट्स्क र लुहान्स्कका नागरिक पनि सहभागी भएका छन् । उनीहरुले पुटिनलाई मतदान गरेको समाचारहरुमा उल्लेख गरिएको छ ।
नारासहित मतदान केन्द्र पुगेका युक्रेनीहरु आफूले पुटिनलाई मतदान गर्न पाएकोमा खुशी व्यक्त समेत गरे ।
औपचारिक घोषणा हुन बाँकी रहेपनि पुटिन पुनः निर्वाचित भएका छन् । पुटिनको यो पाँचौँ कार्यकाल हो ।
मत गणना नसकिँदै पुटिनको जित सुनिश्चित भइसकेको छ । पुटिनले करिब ९० प्रतिशत बढी मतसहित निर्वाचित हुने अन्तर्राष्ट्रिय समाचार एजेन्सीहरुले समाचारमा उल्लेख गरेका छन् । यो सोभियत रुसको इतिहासमै सबैभन्दा बढी मत हो ।
रुसी फेडेरेशनमा नयाँ राष्ट्रपति पदका लागि गत शुक्रबारदेखि आइतबारसम्म तीन दिन चुनाव भएको थियो । हरेक चार वर्षमा नयाँ राष्ट्रपतिको चुनाव हुँदै आएको थियो । तर, संविधान संशोधनपछि अब पुटिन ६ बर्षको लागि राष्ट्रपति निर्वाचित भएका हुन् ।
खराब स्वास्थ्यका कारण तत्कालिन नेता बोरिस यल्तसिनले सत्ता हस्तान्तरण गरेपछि सन् १९९९ देखि पुटिन सोभियत रुसको नेतृत्व गरेका छन् । पहिलो पटक प्रधानमन्त्रीमा नियुक्त भएका थिए ।
