अनलाइन डबली
काठमाडौँ । गैरआवासीय नेपाली संघ (एनआरएनए)का अन्तर्राष्ट्रिय सम्वन्वय परिषद् अध्यक्ष विनोद कुँवरले भूकम्प पीडितका राहत र उद्दारमा सहयोग गर्न अपील गरेका छन् । गएराति जाजरकोटको रामीडाँडा केन्द्र बनाएर गएको शक्तिशाली भूकम्पबाट ज्यान गुमाउनेप्रति श्रद्धाञ्जली अपर्ण गर्दै अध्यक्ष कुँवरले घाइतेको स्वास्थ्यलाभको कामना समेत गरेका छन् ।
अध्यक्ष कुँवरले भूकम्पबाट जाजरकोट, रुकुम पश्चिममा भएको जनधनको क्षतिप्रति दुःख व्यक्त गर्दै देशी र विदेशमा रहेका सहयोगी मनहरुप्रति उद्दार र राहत कार्यमा सहयोग गर्न आग्रह गरेका छन् ।
“जाजरकोट केन्द्रविन्दु भएर गएको भूकम्पबाट जाजरकोट, रुकुमलगायतका क्षेत्रमा ठूलो जनधनको क्षति भएको खबरहरुले चिन्तित बनाएको छ, मृत्यु हुनेहरुप्रति हार्दिक श्रद्धान्जली र घाईतेप्रति शिघ्र स्वस्थ्यलाभको कामना गर्दै यस्तो दुःखद परिस्थितिमा उद्दार तथा राहता कार्य मा आफुले सक्दो सहयोग प्रदान गरिदिनु हुन सम्पूर्ण सहयोगी मनहरुलाई आग्रह गर्दछु” अध्यक्ष कुँवरको अपीलमा भनिएको छ ।
गएराति गएको ६.४ रेक्टरस्केलको भूकम्पमा परी ज्यान गुमाउनेको संख्या १३६ पुगेको छ भने अहिलेसम्म १६५ घाइते भएको पुष्टि भएको छ ।
नेपाल प्रहरीका अनुसार जाजरकोटमा ९८ र रुकुम पश्चिममा ३८ जनाले ज्यान गुमाएका छन् । घाइते जाजरकोटमा ८१ र रुकुम पश्चिममा ८५ जना रहेका छन् ।
घाइतेमध्ये ३३ जनाको जाजरकोटमा उपचार भइरहेको छ । २२ जनालाई सुर्खेत रिफर गरिएको छ ।
यस्तै रुकुम पश्चिममा घाइतेमध्ये ३० जना डिस्चार्ज भएका छन् । ४० जना उपचाररत रहेका छन् । १५ जनालाई थप उपचारका लागि सुर्खेत र नेपालगन्ज रिफर गरिएको छ ।
