अनलाइन डबली
काठमाडौं । पोखरा अन्तर्राष्ट्रिय विमानस्थलबाट भुटानको ड्रुक एयरले यात्रु लिएर पहिलोपल्ट अन्तर्राष्ट्रिय व्यावसायिक उडान भरेको छ ।
भुटानको पारो विमानस्थलबाट चालक दलका तीन सदस्यसहित शनिबार आज बिहान पैने ७ बजे पोखरा ओर्लिएको जहाज ४२ युरोपेली पर्यटक बोकेर सवा ८ बजे थिम्पु फर्किएको हो ।
युरोपेली पर्यटक समुह भारत,नेपाल र भुटान घुम्ने गरी ड्रुक एयर चार्टर गरेका थिए ।भुटानबाट आएको ड्रुक एयरको विमानलाई पोखरा अन्तर्राष्ट्रिय विमानस्थलमा अवतरणका क्रममा शनिबार बिहान पानीको फोहोराले स्वागत गरिएको थियो ।
विमानस्थल प्रमुख देवचन्द्रलाल कर्णका अनुसार सञ्चालनमा आएको ८ महिनापछि पहिलोपटक अन्तर्राष्ट्रिय उडानबाट विमानस्थललाई आम्दानी भएको छ । यसअघि चीनको सिचुवान एयरलाइन्सले छेङ्दुबाट चार्टर्ड उडान गरी पोखरा आएको थियो । उक्त विमान फर्किंदा रित्तै फर्किएको थियो ।
पोखरा पर्यटन परिषद्को नेतृत्वमा पर्यटन व्यवसायीले विमानस्थलमा ड्रुक एयरका चालक दललाई स्वागत र थिम्पु जाने पर्यटकलाई बिदाइ गरेका थिए । जनवरी १ मा उद्घाटन भएको पोखरा अन्तर्राष्ट्रिय विमानस्थल आन्तरिक उडानमै सीमित हुँदा चार्टड गरेर अन्तर्राष्ट्रिय जहाज आउँदा भने पोखराका पर्येटन ब्यबसायी तथा संघसस्थाले भव्य स्वागत र बिदाइ गर्ने गरिरहेका छन् ।
