अनलाइन डबली
धनगढी । नेकपा (माओवादी केन्द्र)का सचिव डिलाराम आचार्यले समाजवाद पुग्ने पार्टीका अभियानमा सुदूरपश्चिमका साथ र सहयोग दिनेमा आफू विश्वस्त रहेको बताएका छन् । मंगलबार सम्पन्न सुुदूरपश्चिम प्रदेशको बैठकलाई सम्बोधन गर्दै आचार्यले गणतन्त्र ल्याउनजस्तै समाजवादी आन्दोलनमा पनि सुदूूरपश्चिमका जनता एउटा पिलरको रुपमा बताएका हुन् ।
जनता नबिग्रेको भन्दै आचार्यले तीन महिने अभियनमा नेता कार्यकर्ताले आत्मसमिक्षासहित जनताको घरदैलोमा पुुगेर समाजवादी आन्दोलनमा साथ दिन अपील गर्नुुपर्ने बताए । उनले जनताले सुकिलामुकिला माओवादी नचाहेको बताउँदै सचिव आचार्यले अभियानको क्रममा जनशैली अपनाउन पनि निर्देशन दिए ।
“जनता होइन हामी नेताहरु बिग्रेको छौं, जनताले सुकिलामुकिला होइन, आफूूजस्तै माओवादी खोजेको छ । राजतन्त्रात्मक व्यवस्था ढालेर गणतन्त्र ल्याउन जनताले माओवादीलाई साथ दिएका थिए । तर हाम्रो पछिल्लो पटकका व्यवहारले आफूहरुसँग गरेका वाचा र प्रतिवद्धता माओवादीले तोड्यो कि भन्ने जनतालाई शंका पैदा भएको छ । त्यो शंका मेटाउन आत्मसमिक्षासहित जनतामा जान अभियान घोषणा गरिएको हो । अब हामीले फेरि कमिकमजोरीप्रति आत्मसमिक्षा गर्दै जनतासँग एकाकार गर्नुपर्छ” सचिव आचार्यले भने ।
माओवादीकै नेतृत्वमा व्यवस्था परिवर्तन भएको बताउँदै आचार्यले अबको मिसन जनताको अवस्था बदल्नु भएको बताए । उनले आफ्नो पार्टीको नेतृत्वको सरकारले सुशासन र भ्रष्टाचारविरुद्ध अहिलेसम्म कसैले नगरेका काम गरेको बताए ।
गणतन्त्रबाट प्राप्त उपलब्धीलाई जनतासमक्ष पुुर्याउने र समाजवादी आन्दोलनको लागि हातेमालो गर्न पार्टी अभियानात्मक रुपमा अगाडि बढेको बताए । यही १६ गतेबाट सुरु हुने लागेको तीन महिने अभियान त्यसको पहिलो चरण भएको बताए । “जनताको मत बुुझेर निर्णय गर्नु गणतन्त्र हो भने जबरजस्त लाद्नु सामन्तवाद हो । पार्टीले जनताको मत अनुसार नयाँ आन्दोलनको सुरुवात गरिसकेको छ । यो तीन महिना वडासम्मै पुुगेर जनताको मत संकलन गर्ने, त्यसपछि नयाँ योजना बनाएर अगाडि बढ्छौं” आचार्यले भने ।
बैठकले तीन महिने अभियनमा प्रदेशका ९ वटै जिल्लामा नेताहरुको कार्यविभाजन गरेको छ । ९ वटा जिल्लामा केन्द्रीय सदस्यहरुको नेतृत्वमा ७९ अभियान टोली बनाएको छ । बैठकले तीन महिने अभियानमा जिल्ला कमाण्डर पनि तोकेको छ । जसमा अछाम ओमप्रकाशन पुन, बाजुरा देवकी मल्ल, बझाङ लालबहादुर सोडारी, डोटी लक्षिराम आचार्य, डडेल्धुरा हरि ज्ञावाली, बैतडी रामप्रसाद तिमिल्सिना, दार्चुला नरेन्द्रर कुँवर, कञ्चनपुर वीरमान चौधरी र कैलालीमा टेकेन्द्र भट्ट रहेका छन् ।
