अनलाइन डबली
काठमाडौं । मिटरब्याजीले विनित सोनारको विष सेवन गर्न बाध्य बनाएका छन् । मिटरब्याज पीडित सोनारले जिल्ला प्रशासन कार्यालय मोरङमा विष सेवन गरेका हुन् ।
विष सेवनबाट गम्भीर घाइते सोनारको निधन भएको छ । कटहरी गाउँपालिकाका सोनारको मृत्युको विरोधमा मिटरब्याजपीडितले काठमाडौंमा विरोध प्रदर्शन गरेका छन् ।
मिटरब्याज तथा ठगीविरुद्ध संघर्ष समितिको केन्द्रिय सदस्य विशाल राना क्षेत्रीले आफूहरु विगत ३४ महिनादेखि हामी आन्दोलनमा रहेको जानकारी दिँदै साउन ७ गते जिल्ला प्रशासन कार्यालय, मोरङमा मिटरब्याजसम्बन्धी छलफलले पनि निकास नदिएपछि सोनार विष सेवन गर्न बाध्य भएको बताए ।
सोनारले डा. नितेश तिवारीसँग ७ लाख रुपैयाँ, प्रदीप भुजेलसँग २ लाख, र विनोद ढकालसँग ६ लाख रुपैयाँ लिएका थिए । भुजेल र ढकालले चेक बाउन्स भएको भन्दै किटानी जाहेरी दिएको प्रहरीले जनाएको छ । सोही जाहेरीका आधारमा सोनारलाई पक्राउ गर्न प्रहरी प्रशासन कार्यालय पुगेको थियो ।
सोनारले आफूले लिएको रकमको दोब्बर तिरिसक्दा पनि ब्याजीले त्यो भन्दा धेरैको हिसाब राखेको र तिराउन मानसिक तनाव दिन थालेको सहकार्मीसँग बताउँदै आएका थिए ।
