अनलाइन डबली
काठमाडौं । बागमती प्रदेश सरकारले नारायणबहादुर कार्कीसहित दुई जना कर्मचारीलाई ११ औं तहमा बढुवा गरेको छ । आइतबार बसेको मन्त्रिपरिषद्को बैठकले स्वास्थ्य सेवातर्फ नारायणबहादुर कार्की र इन्जिनियर सेवातर्फ लोकनाथ रेग्मीलाई ११औँ तहमा बढुवा गर्ने निर्णय भएको हो ।
११ औं तह प्रदेशको सचिव सरहको दरबन्दी हो । बढुवा भएका दुबै जनालाई सरकारले आवश्यकतामा प्रदेश सचिवको जिम्मेवारी दिन सक्नेछ ।
त्यसैगरी प्रदेश सरकारले विभिन्न कार्यालय तथा निकायका लागि दरबन्दी स्वीकृत गर्ने निर्णय गरेको छ । काम गर्दै आएका अस्थायी र करारका एक हजार पाँच सय ९५ दरबन्दी स्वीकृत गरेको छ भने प्रदेश श्रम तथा रोजगार नीति २०८० लाई स्वीकृत गर्ने निर्णय गरेको छ ।
यसअघि संघको ऐनसँग बाँझिनगरी गरेको चारजना कर्मचारीको बढुवाबारे अदालतले अन्तिम फैसला दिएको छैन । मुख्यमन्त्री तथा मन्त्रिपरिषद्को कार्यालयले दिपक प्रसाद तिवारी, वसन्त अधिकारी, डा. अर्जुन प्रसाद सापकोटा र डा. नरेन्द्र कुमार झालाई बढुवा गरेको थियो । सरकारले चारै जनालाई निर्देशक तथा प्रमुख मेडिकल सुपरिटेन्डेन्टमा बढुवा गरेको थियो ।
गैरकानुनी भन्दै परेको रिटको सुनुवाइ गर्दै उच्च अदालत पाटनले बढुवा कार्यान्वयन नगर्न अन्तरिम आदेश दिएको छ ।
