अनलाइन डबली
काठमाडौं । भारतको धौलीगङ्गा जलविद्युत् परियोजनाकाे बाँधका ढोका खोलेको छ । विहानदेखि राति ८ बजेसम्म बाँधको ढाेका खोल्ने सूचना जारी गरिएको छ । स्थानीय प्रशासनले महाकाली नदी किनारमा बसोबास गर्नेहरुलाई बेलुकासम्म सतर्कता अपनाउन आग्रह गरेको छ ।
यसपटक भारतले पूर्वसूचना दिएपनि कति क्यूसेक पानी नदीमा छोड्ने हो भन्नेबारे भारतले बताएको छैन । वर्षाका कारण महाकाली नदीमा पानीको सतह बढेको बेला बाँधका ढोका खोल्दै नेपालतर्फ क्षति पुर्याउन सक्ने अनुमान गरिएको छ । नदीमा पानीको सतह कति बढ्छ भन्ने कुरै नै थाहा नभएकोले स्थानीय अन्यौलमा छन् । कति पानी छोड्ने हो भन्ने पूर्व जानकारी नदिएका कारण नेपालतर्फ क्षति हुन सक्ने स्थानीयहरु बताउँछन् ।
भारतको उत्तराखण्ड प्रदेश पिथौरागढ जिल्लाको छिरकिल्लामा रहेको उक्त बाँधको ढोका आज १५ घण्टाका लागि खोल्न लागिएको हो ।
यसअघि जिल्ला प्रशासन कार्यालय दार्चुलाले सूचना निकालेर महाकाली नदी किनारमा बसोबास गर्नेलाई सतर्कता अपनाएर सुरक्षित ठाउँमा बस्न तथा नदी छेउछाउ नजान आग्रह गरिसकेको छ । सहायक प्रमुख जिल्ला अधिकारी प्रदीपसिंह धामीका अनुसार धौलीगङ्गा जलविद्युत् परियोजनाकाे बाँधका ढोका अहिले बिहानदेखि आज राति ८ बजेसम्म खुल्नेछन् । यो अवधि र त्यसपछि पनि महाकाली नदीमा पानीको सतह बढ्ने भएकाले सतर्कता अपनाउन तथा नदी वारपार नगर्न आग्रह गरिएको छ ।
बाँध खोलिएपछि दार्चुलादेखि बैतडी, डडेल्धुरा, कञ्चनपुर भएर भारततिर बग्ने महाकालीमा पानीको बहाव र सतह बढ्न छ । सीमा क्षेत्रका नेपाली भूमी जोखिमा परेका छन् ।
२०७० साल असार २ र ३ गते एक्कासी धौलीगङ्गाको बाँध खोलेपछि दार्चुला सदरमुकाममा सयभन्दा बढी घर बगाउनुका साथै अर्बौँ रुपैयाँको क्षति भएको थियो । संवाद डबलीले उक्त कुराको सार्वजनिक गरेपछि सरकारले अध्ययन टोली खटाएको थियो । उक्त टोलीको प्रतिवेदन कार्यान्वयन हुन सकेको छैन ।
- फाइल फोटो
