काठमाडौँ । प्रहरीले सञ्चार मन्त्रालयका सचिव कृष्ण बहादुर राउतलाई पक्राउ गरेको छ । बालुवाटारस्थित ललिता निवासको जग्गा हिनामिना संलग्न भएको आरोपमा केन्द्रीय अनुसन्धान ब्युरोले उनलाई पक्राउ गरेको हो ।

राउतले २०६७ असारमा भौतिक योजना तथा निर्माण मन्त्रालयमा शाखा अधिकृत हुँदा विशिष्ट व्यक्तिहरूको निवास बिस्तार सम्बन्धमा गुरुयोजना तयार गर्ने प्रस्तावको टिप्पणी उठाएका थिए ।

२०६७ असार २८ मा भौतिक योजना तथा निर्माण मन्त्रालयका तत्कालीन सचिव दीप बस्न्यातले टिप्पणी सदर गरेका थिए । त्यतिबेला काँग्रेस नेता विजय गच्छदार मन्त्री थिए ।

ब्यूरोको अनुसार निवास बिस्तार र ललिता निवास क्षेत्रमा बाटो बिस्तार गर्दा २७ रोपनी जग्गा हिनामिना भएको छ । सभामुख निवासबाट एनआरएनए भवन तर्फ जाने बाटोमा ८ रोपनी जग्गा परेको छ ।