अनलाइन डबली
काठमाडौं । बागमती प्रदेशका भौतिक पूर्वाधार विकास मन्त्री युवराज दुलाल ‘शरद’ ले पनि कार्यकक्षमा ग्रेटर नेपालको नक्सा राखेका छन् । नेकपा माओवादी केन्द्रका नेता समेत रहेका मन्त्री दुलालले बिहीबार आफ्नो कार्यकक्षमा चुच्चे नक्साको ठाउँमा ‘ग्रेटर नेपाल’को नक्सा राखे ।
भारतले आफ्नो नवनिर्मित संसद् भवनमा नेपालको केही स्थानहरू समेटेर ‘अखण्ड भारत’को नक्साको विरोध गरिरहेका मन्त्री दुलालले आफ्नाे कार्यकक्षमा ग्रेटर नेपालको नक्सा राखेर विरोधलाई नयाँ उचाइमा उठाएका छन् ।
विवादित भारतीय चलचित्र आदिपुरुषका लेखकले नेपाल भारतबाट छुटिएर गएको दाबी गरेपछि नेपालमा चौतर्फी विरोध भइरहेको छ ।
यसअघि काठमाडौं महानगरपालिकाका मेयर बालेन साहले भारतले संसदमा राखेको ‘अखण्ड भारत’ को नक्साको विरोध जनाउँदै आफ्नो कार्यकक्षमा ‘ग्रेटर नेपाल’को नक्सा राखेका थिए ।
बालेनले चलचित्र आदिपुरुषमा सीता भारतमा जन्मिएको भनेर गलत राष्ट्रियतामाथि हस्तक्षेप गर्न खोजेको बताउँदै काठमाडौं महानरभित्रका हलमा उक्त चलचित्र प्रदर्शनमा रोक लगाएका छन् । आदालतले चलचित्र प्रदर्शनमा रोक नलगाउने आदेश दिएको छ तर बालेनले उक्त आदेश नमान्ने सार्वजनिक रुपमै बताइसकेका छन् ।
