अनलाइन डबली
धनगढी । डडेल्धुराको अजयमेरु गाउँपालिकाले कृषि एम्बुलेन्स सेवा सुरु गरेको छ । किसानको बारीदेखि बजारसम्म सेवा दिने उद्देश्यले एम्बुलेन्स सेवा सुरु गरेको गाउँपालिका अध्यक्ष उमेशप्रसाद भट्टले जानकारी दिए ।
एम्बुलेन्सले किसानको बारीमा उत्पादन भएको तरकारी तथा अन्नबाली बजारमा पुर्याउने र किसानको माग अनुसार बजारको बस्तु किसानको घरसम्म ल्याउने भट्टले अनलाइन डबलीसँग बताए ।
किसानले उत्पादन गरेको बस्तु बजारसम्म पुर्याउन नसक्दा खेर जाने गरेको र बजारबाट कृषि सामाग्री तथा बस्तु ल्याउन उत्पन्न हुने समस्याको समाधान गर्न कृषि एम्बुलेन्स सेवा गरेको गाउँपालिकाले जनाएको छ ।
महंगो ढुवानीका कारण किसानले उत्पादन गरेको बस्तुमा बारीमै कुहिने समस्याबाट मुक्त हुने अपेक्षा गरिएको छ ।
एम्बुलेन्सले पालिका बाहिर पनि सेवा दिने अध्यक्ष भट्टले जानकारी दिए ।
गाउँपालिका अध्यक्ष भट्टले कृषि एम्बुलेन्सबाट सेवा लिन किसानहरुलाई अनुरोध गरेका छन् । पालिकाको उदारणीय कार्यबाट किसानहरु खुशी भएका छन् ।
