अनलाइन डबली
काठमाडौँ । समयमै नेपाल भित्रिएको मनसुनका कारण काठमाडौँसहित देशका पूर्वी र मध्य भागमा वर्षा भइरहेको छ । गएराति काठमाडौँसहितका ठाउँमा भारी वर्षा भएको थियो भने विहानैबाट मौसम बदली भइरहेको छ ।
मौसम पूर्वानुमान महाशाखाका अनुसारका अनुसार आज पनि बाग्मती, गण्डकी र कोशी प्रदेशका केही ठाउँमा हल्कादेखि मध्यम वर्षाको सम्भावना छ भने केही भागमा ठूलो वर्षा हुनेछ । पूर्वी क्षेत्रमा वर्षा भइरहेपनि पश्चिमी भूभागमा भने अझैं अडेरी परेको छ । महाशाखाले नेपालमा हिजो मनसुन भित्रिएको जनाएको छ ।
गण्डकी, कोशी र बाग्मती प्रदेशका केही ठाउँमा ठूलो वर्षा भएको छ । ठूलो वर्षाका कारण यी प्रदेशका केही नदी तथा खोलामा पानीको बहाव बढेको छ ।
पछिल्लो २४ घण्टामा लमजुङको खुदी बजारमा १३० मिलिमिटर पानी परेको छ । यस्तै, लमजुङकै कुन्सामा १०३ मिलिमिटर, कास्कीको सिक्लेसमा ९३ दशमलव २, लमजुङको गैरीढुंगामा ८५, रैनास्तर ९० दशमलव ४ मिलिमिटर वर्षा भएको छ ।
यस्तै, बाग्मती प्रदेशको मकवानपुरको दामनमा ७० दशमलव २ मिलिमिटर वर्षा भएको छ । यस्तै, धादिङ धुनीबेशीमा ७१ दशमलव ४, काठमाण्डौको बूढानीलकण्ठ आसपासमा ३६ मिलिमिटर र ललितपुरको लेलेमा ६० दशमलव ४ मिलिमिटर वर्षा भएको छ ।
ठूलो वर्षासँग बाढी पहिरोको उच्च जोखिम रहेकोले सतर्क रहन महाशाखाले आग्रह गरेको छ ।
