अनलाइन डबली
काठमाडौँ । प्रधानमन्त्री प्रचण्ड भारतको चारदिने औपचारिक भ्रमण पूरा गरी स्वदेश फर्किएका छन् । नयाँदिल्लीस्थित इन्दिरागान्धी अन्तर्राष्ट्रिय विमानस्थमा भारतीय विदेशमन्त्रालयका राज्यमन्त्री मिनाक्षी लेखीले उनलाई बिदाइ गरेकी थिइन् ।
प्रधानमन्त्रीले भारत भ्रमणका क्रममा भारतीय समकक्षी नरेन्द्र मोदीसँग तीनपटक ‘वान टु वान’ भेटवार्ता गरेका थिए । त्यस्तै, प्रतिनिधिमण्डलस्तरीय छलफलपछि दुई देशबीच सात बुँदे सहमति भएको थियो । भ्रमणकै क्रममा प्रधानमन्त्री प्रचण्डले भारतका राष्ट्रपति दौपदी मुर्मू एवं उपराष्ट्रपति जगदीप धनखडसँग शिष्टाचार भेटवार्ता गरेका थिए।
प्रधानमन्त्री प्रचण्ड भारतको मध्यप्रदेशस्थित इन्दौर सहरमा पुगी त्यहाँको फोहर व्यवस्थापनको बारेमा जानकारी लिनुका साथै विज्ञानप्रविधिसम्बन्धी क्षेत्रको अवलोकन गरेका थिए । उनी आजै इन्दौरबाट नयाँदिल्ली आएका थिए ।
भ्रमणका क्रममा नेपाल–भारतबीच ऊर्जा व्यापार सम्झौता, पारवहन सन्धि नवीकरण, अन्तरदेशीय प्रसारण लाइन निर्माणलगायतका विभिन्न सम्झौता एवं समझदारी भएका छन् । प्रधानमन्त्री प्रचण्ड यही जेठ १७ गते औपचारिक भ्रमणका लागि भारत प्रस्थान गरेका थिए।
