अनलाइन डबली
काठमाडौं । नेकपा एमालेका उपाध्यक्ष रामबहादुर थापा ‘बादल’ परिवार र आफन्तको सम्पर्क बाहिर गएका छन् । छोरा प्रतिक थापाविरुद्ध पक्राउ पुर्जी जारी भएपछि बादल आफन्त र बाहिर सम्पर्क अलग भएका हुन् । उसै पनि सार्वजनिक सम्पर्कभन्दा टाढै बस्न चाहने बादल यो प्रकरणसँगै सार्वजनिक सम्पर्क विच्छेद गरेका हुन् ।
यस विषयमा प्रतिक्रिया लिन हामीले बादलको मोवाइलमा सम्पर्क गर्न खोज्दा समेत सम्पर्क हुन सकेन ।
बादल गृहमन्त्री भएकै बेला नेपाली नागरिकलाई भुटानी शरणार्थी बनाएर अमेरिका पठाउने भन्दै असूली गर्ने गिरोहमा संलग्न भएको पुष्टि भएपछि प्रतिकविरुद्ध पक्राउ पुर्जी जारी भएको हो ।
उक्त गिरोहमा प्रतिक पनि संलग्न भएको भन्दै प्रहरीले पक्राउ पुर्जीको लागि जिल्ला अदालत, काठमाडौंसँग माग गरेको थियो । अदालतले प्रहरीले पेश गरेको प्रमाणका आधारमा पक्राउ पुर्जी जारी गरेको बताइएको छ ।
प्रहरीको उपत्यका अपराध अनुसन्धान कार्यालयले १२ चैतमा भुटानी शरणार्थी बनाएर अमेरिका पठाइदिन्छु भन्दै असूली गरेको आरोपमा मोरङका केशव दुलाल, ललितपुरका सानु भण्डारी र पाँचथरका टेक गुरुङलाई पक्राउ गरेको थियो । यसको तीन दिनपछि मोरङका सागर राई पनि पक्राउ परेका थिए ।
प्रहरीले बादलका सुरक्षा सल्लाहकार डा. इन्द्रजित राई, तत्कालिन गृहसचिव एवं राष्ट्रपति कार्यालयका वहालवाला सचिव टेकनारायण पाण्डे र सन्दीप रायमाझीसहित ८ जनालाई पक्राउ गरेर छानविन अगाडि बढाएको छ ।
तत्कालिन केपी ओली नेतृत्वको सरकारले शरणार्थी दर्ता प्रक्रियामा छुटेकाहरुबारे अध्ययन र थप प्रमाण जुटाउन भन्दै २९ असार २०७६ मा कार्यदल गठन गरेको थियो । गृह मन्त्रालयका तत्कालीन सहसचिव बालकृष्ण पन्थीको संयोजकत्वमा कार्यदलसँग मिलेर मोटो रकम असुल गरेर नक्कली शणार्थी बनाएर अमेरिका पठाउने कार्यमा उनीहरुको संलग्नता देखिएको प्रहरीको अनुसन्धानले देखाएको छ ।
