अनलाइन डबली
काठमाडौं । एसीसी प्रिमियर कप क्रिकेटको फाइनल खेल आज हुँदैछ । हिजो वर्षाका कारण स्थगित आज त्रिवि क्रिकेट मैदानमा पुनः उस्तै अवस्थामा सुरु हुने भएको हो ।
नेपालले सुरुवाती राम्रो प्रदर्शन गरेको छ । नेपालले हिजोकै अवस्थामा आज खेल्यो भने उपाधि जित्ने दाबी समर्थकहरुले गरेका छन् ।
कीर्तिपुर मैदानमा खेल रोकिनुअघि पहिला ब्याटिङ गरिरहेको यूएई २७ ओभर ३ बलमा ९ विकेट गुमाएर १ सय ६ रनको सामान्य अवस्थामा छ । आजको ‘रिजर्भ डे’ मा बिहान ९ बजे यूएईले खेल थाल्नेछ । नेपाली स्पिनर ललित नारायण राजवंशी ह्याट्रिक विकेटको नजिक छन् । आज पनि पानी पर्ने पूर्वानुमान गरिएको छ । वर्षाले खेल रोकिएमा ओभर घटाएर खेलाइनेछ ।
ओभर घटाएर पनि खेल सम्भव नभए सुपर ओभर खेलाइनेछ । सुपर ओभर पनि हुन नसक्ने अवस्थामा भने एकदिवसीय अन्तर्राष्ट्रिय वरीयताको आधारमा नेपाल विजेता हुनेछ र आउँदो सेप्टेम्बरमा हुने एसिया कपमा छनोट हुनेछ । एकदिवसीय वरीयतामा नेपाल १४औँ तथा यूएई १९ औँ नम्बरमा छ।
नेपाल क्रिकेट सङ्घ (क्यान) का अनुसार फाइनल खेल हेर्न नि:शुल्क प्रवेशको व्यवस्था गरिएको छ ।
