
काठमाडौं । देशभर फैलिएकोक वायु प्रदूषण अझै केही दिन रहने मौसम पूर्वानुमान महाशाखाले जनाएको छ । महाशाखाका अनुसार अहिले काठमाडौंसहित उपत्यकासहित देशका धेरैजसो ठाउँमा बढिरहेको वायु प्रदूषण अझै तीन दिनसम्म कायमै रहनेछ ।
हावा नचलेको र पानी पनि नपरेका कारण प्रदूषणलाई नेपालबाट अन्यत्रै जान सकेको छैन । हावा चल्ने र पानी पर्ने पनि सम्भावना नरहेकाले प्रदूषण अझै स्थिर रहने बताइएको छ ।
अहिले देशका धेरै स्थानमा डढेलो लागेकाले वायु प्रदूषण उच्च भएको महाशाखाले जनाएको छ ।
वातावरण विभागका प्रवक्ता शंकरप्रसाद पौडेलका अनुसार डढेलोबाट निस्किएको धुवाँसँगै पानी पानी नपर्नु र हावा कम चल्नाले प्रदूषण सतह नजिक थुप्रिएको छ । काठमाडौं उपत्यकामा पर्सा, बारा,र चितवनबाट निस्किएको धुवाँका कारण प्रदूषण बढेको पौडेलले बताए । बाग्मती काेरिडोर हुँदै हावा काठमाडौं उपत्यका पसेका कारण प्रदूषणको मात्रा बढेको हो ।
प्रदूषणका कारण ब्लड प्रेसर बढ्ने, मुटुको समस्या, क्यान्सरलगायतका समस्याहरू बढ्ने विज्ञहरुले बताएका छन् । जलवायु तथा विपदविज्ञ डा. धर्म उप्रेतीले प्रदूषणबाट जोगिन सावधानी अपनाउन आग्रह गरेका छन् । उनले वायु प्रदूषण बढिरहेकाले घरबाहिर सकेसम्म ननिस्किन र निस्कनै परे मास्कको अनिवार्य प्रयोग गर्न विज्ञहरूको सुझाव दिएका छन् ।
उप्रेतीले केही दिनका लागि धुँवा निकाल्ने गाडी र मापदण्ड पालना नगरेका गाडी सञ्चालन गर्न नदिन सरकारसँग आग्रह समेत गरेका छन् । उनले सडक निर्माणका क्रममा सडक अलपत्र बनाइँदा धुवाँ र धुलो धेरै भएकाले सडक कालोपत्र गर्न र कालोपत्र गर्न नसके सडक भत्काउने काम बन्द गर्नुपर्ने बताए ।