अनलाइन डबली
काठमाडौं । जन्मदिन मनाइरहेको पाटीमा गोली चल्दा चार जनाको मृत्यु भएको छ भने २८ जना घाइते भएका छन् । यो अमेरिकाको घटना हो । अन्तर्राष्ट्रिय संचारमाध्यमहरुका अनुसार अमेरिकाको अलाबामा राज्यमा भएको गोलीकाण्ड भएको हो ।
अलाबामाका गभर्नर केभ आइभीका अनुसार स्थानीय समयअनुसार राति १०ः३० बजे घटना घटेको थियो । आइभीले आफू शोकमा डुबेको बताउँदै भने ‘आज बिहान, म डेडेभिलका जनता र अलाबामाका मेरा सहकर्मीहरूसँग शोकमा छु। हाम्रो राज्यमा हिंसाको कुनै ठाउँ छैन।’
डेडेभिल पुलिस र हाईस्कूल फुटबल टोलीका लागि धर्मगुरुको रूपमा सेवा गरेका बेन हेसले मारिने अधिकांश किशोर किशोरी रहेको बताएको अन्तर्राष्ट्रिय संचारमाध्यमहरुले बताएका छन् । उनले मारिएका युवा स्टार खेलाडीमध्येका एक भएको र उनीहरु धेरै राम्रो मान्छे भएको बताए ।
लगभग ३२ सय जनसङ्ख्या भएको यो सहर अलाबामा को पूर्वी भागमा तल्लापोसा काउन्टीमा रहेको छ।
त्यसैगरी अमेरिकाको केन्टकी राज्यको लुइसभिलको एउटा पार्कमा गोली चलेको अर्को घटना भएको छ । उक्त घटनामा दुई जनाको मृत्यु भएको र चारजना घाइते भएको समाचार छ ।
