अनलाइन डबली
काठमाडौं। उपचुनावको लागि उम्मेदवारी दर्ता गरेसँगै राष्ट्रिय स्वतन्त्र पार्टीका सभापति रवि लामिछानेविरुद्धको रिट निवेदन सर्वोच्च अदालतमा दर्ता भएको छ । राहदानी दुरुपयोगमा गैरकानूनी रुपमा उन्मुक्ति दिइएको भन्दै परेको रिट निवेदन सर्वोच्च अदालतले दर्ता गरेको हो ।
अधिवक्ता युवराज सफलले लामिछानेमाथि पर्याप्त अनुसन्धान नगरी उनीमाथि मुद्दा नचल्ने निर्णय भएको भन्दै अदालतमा रिट निवेदन लिएर सर्वोच्च पुगेका थिए ।
निवेदनमा अधिवक्ता सफलले रविमाथि मुद्दा नचल्ने भनी महान्यायाधीवक्ता कार्यालयले गरेको निर्णय बदर हुनुपर्ने र उनीमाथि अनुसन्धान गरी मुद्दा चलाउने आदेश हुनुपर्ने माग गरेका छन् । रिट निवेदनमाथि मंगलबार प्रारम्भिक सुनुवाइका लागि पेशी तोकिएको छ ।
राहदानी दुरुपयोग गरेको भनी परेको उजुरीमा अनुसन्धान गरेको प्रहरीले लामिछानेमाथि मुद्दा नचल्ने राय सहित प्रहरीमा प्रतिवेदन पेश गरेको थियो । त्यही प्रतिवेदनका आधारमा सरकारी वकिलले मुद्दा नचल्ने भनी गरेको निर्णयलाई महान्यायाधीवक्ताले सदर गरेका थिए ।
कानुन व्यवसायीहरुले रविको उम्मेदवारी गैरकानूनी भएको दाबी गरेका छन् ।
