अनलाइन डबली
काठमाडौं । रुसले आफ्नो देशको जासुसी गरेको भन्दै एक अमेरिकी पत्रकारलाई पक्राउ गरेको छ । द वाल स्ट्रीट जर्नलका अमेरिकी पत्रकार एभन गोर्स्कभीचलाई रुसले रंगेहात पक्राउ गरेको रुसी संचारमाध्यमहरुले बताएका छन् ।
एभन यक्याटरिङबर्गमा सुरक्षासँग सम्बन्धित जासुसी गरिरहेको बेला पक्राउ गरेको रुसले दाबी गरेको छ । रोक लगाइएका गैरकानुनी गतिविधिबारे गोप्य सूचना संकलन गरिरहेको बेला पक्राउ गरिएको मस्कोले जनाएको बीबीसीले समाचारमा उल्लेख गरेको छ ।
एभनले अमेरिकी सरकारको निर्देशनमा काम गरिरहेको रुसले दाबी गरेको छ । उनलाई लिफोर्टोभो जिल्ला अदालतमा लगेर औपचारिक रूपमा पक्राउ गरिएको थियो । अदालतले एभनलाई मे २९ तारिखसम्म थुनामा राख्न आदेश दिएको छ।
उक्त अदालतमा त्यसअघि बमको जोखिम रहेको भन्दै आगन्तुक र कर्मचारीलाई बाहिर पठाइएको रुसको रीआ सरकारी न्यूज एजेन्सीले जनाएको छ।
एफएसबीले एउटा विज्ञप्तिमा एभन गोस्कर्भीचसँग मस्कोभन्दा १,८०० किलोमिटर पूर्वमा काम गर्दै गर्दा विदेश मन्त्रालयको अनुमतिपत्र रहेको जनाएको छ।
द वाल स्ट्रीट जर्नलको यसै साता प्रकाशित उनको पछिल्लो लेखमा रुसको खस्कँदो अर्थतन्त्र र क्रेम्लिनले बढ्दै गएको सैनिक खर्चसँग जुझ्न गरिरहेको भन्दै रिपोर्ट प्रकाशित भएको थियो ।
एभनले अमेरिकी इशारामा रुसको रक्षा उद्योगका बारेका राज्यका गोप्य गतिविधिबारे सूचना सङकलन गरेको रुसले दाबी गरेको छ । उसले एउटा फौजदारी जासुसी मुद्दा समेत अघि बढाइएको बताएको छ।
द वाल स्ट्रिट जनर्लले एभनको सुरक्षाबारे चिन्ता व्यक्त गरेको छ ।
रुसको विदेश मन्त्रालयका प्रवक्ता दिमित्री पेश्कोभले उक्त विषय एफएसबीको जिम्मेवारीमा पर्ने र उनीहरूले विज्ञप्ति जारी गरिसकेको बताएका छन्। “मैले भन्न सक्ने थप कुरा के मात्रै छ भने उनी रङ्गेहात पक्राउ परेका हुन्” दिमित्रीले भने ।
रुसमा जासुसीको अभियोगमा अधिकतम २० वर्षसम्म सजाय हुनसक्छ।
