अनलाइन डबली
काठमाडौं । स्वतन्त्र विद्यार्थी युनियन (स्ववियु) को चुनाव आज हुँदैछ । १४ बर्षपछि त्रिभुवन विश्वविद्यालयअन्तर्गतका क्याम्पसमा चुनाव हुन लागेको हो । त्रिविका ६० आंगिक र एक हजार ४० सम्बन्धन क्याम्पसमा निर्वाचन हुँदैछ ।
स्ववियु निर्वाचनअन्तर्गत आज बिहान ८ देखि अपराह्न ४ बजेसम्म मतदान हुनेछ । मतदान सकिएपछि केही क्याम्पसबाट साँझ र धेरैले रातिबाट मतगणना सुरु गर्ने तयारी गरेका छन् ।
त्रिविका स्ववियु निर्वाचन केन्द्रीय अनुगमन तथा समन्वय समितिका अनुसार अहिलेसम्म दुई आङ्गिक र केही सम्बन्धन प्राप्त क्याम्पसमा निर्विरोध निर्वाचित भइसकेका छन् ।
त्रिविले एक विज्ञप्ति जारी गर्दै स्ववियु निर्वाचन सफलतापूर्वक सम्पन्न गर्नका लागि सहयोग गर्न सबैमा अपील गरेको छ ।
स्ववियु चुनावमा मुख्यगरी तीन संगठनबीच कडा प्रतिस्पर्धा हुने देखिएको छ । नेकपा माओवादी केन्द्र अखिल क्रान्तिकारी, नेपाली काँग्रेस निकट नेपाल विद्यार्थी संघ र नेकपा एमाले निकट अनेरास्ववियुबीच मुख्य प्रतिस्पर्धा हुने देखिएको छ ।
अहिलेसम्म अखिल क्रान्तिकारी सबैभन्दा धेरै ३४ क्याम्पसमा निर्विरोध निर्वाचित भइसकेको छ । नेविसंघ र अनेरास्ववियु भन्दा अखिल क्रान्तिकारीले दोब्बर बढी क्याम्पसमा जित हात पारिसकेको छ ।
