धनगढी । चाहिनेबेला पानी नपरेको डोटीमा बाली भित्र्याउने बेला भने असिना पानी परेको छ । खडेरीबाट बचेको भित्र्याउने बेला असिनाले क्षति पुर्याएपछि डोटीका किसान चिन्तित बनेका छन् ।
गएराति डोटीका ९ वटै पालिकामा असिना पानी परेर गहुँ, जौँ, मुसुरो, तोरीलगायत तरकारी खेतीका साथै फलफूल खेतीमा क्षति भएको पुर्याएको छ ।
जिल्ला कृषि ज्ञानकेन्द्र सिलगढीका अनुसार बाली पाकेर भित्र्याउने समय हुनै लाग्दा परेको असिनाले बालीमा क्षति पुर्याउँदा किसान चिन्तित छन् । असिना पानी जिल्लाका नौवटै पालिकामा क्षेती गरेको भए पनि सबै भन्दा धेरै क्षति बोगटान फुड्सिल गाउँपालिकामा भएको बताइएको छ ।
यसैगरी सुन्तलाका पात समेत झार्ने गरी असिना परेकाले किसानहरुलाई ठूलो नोक्सानी पुर्याएको छ । असिना पानीको क्षतिको एकिन विवरण संकलन गर्ने कार्य भइरहेको केन्द्रले जनाएको छ ।
यसैबीच देशमा स्थानीय वायु तथा पश्चिमी वायुको सामान्य प्रभावका कारण आज पनि देशका विभिन्न भागमा असिना पानी पर्ने अनुमान मौसम पूर्वानुमान महाशाखाले गरेको छ । गण्डकी र लुम्बिनी प्रदेशमा सामान्य बदली रही देशका अन्य प्रदेशका पहाडी तथा हिमाली भू-भागहरूमा आंशिक बदली रहेको छ ।
आज दिउँसो कोशी, बागमती र गण्डकी प्रदेशका पहाडी भू-भागका केही स्थानहरूमा अपराह्नतिर चट्याङ्गसहित हल्का वर्षाको सम्भावना रहेको छ।
आज राति देशको पहाडी भू-भागहरूमा आंशिक देखी सामान्य बदली तथा बाँकी भू-भागमा आंशिक बदली देखि मौसम सामान्यतया सफा रहनेछ। कोशी, बागमती, गण्डकी, र सुदूरपश्चिम प्रदेशका पहाडी भू-भागका एक-दुई स्थानमा चट्याङ्गसहित हल्का वर्षाको सम्भावना रहेको छ।
