अनलाइन डबली
काठमाडौँ । चीनको नयाँ राष्ट्रपतिमा पुनः सी चिनफिङ निर्वाचित भएका छन् । चीनको संसद्, नेशनल पिपुल्स कंग्रेस (एनपीसी) ले सी तेस्रो पटक चीनको राष्ट्रपतिमा निर्वाचित गरेको हो ।
एनपीसीका झन्डै तीन हजार सदस्यले सर्वसम्मतिले सी जिनपिङको पक्षमा मतदान गरेको चिनियाँ संचारमाध्यमहरुले बताएका छन् । एक घण्टासम्म मतदान चलेको थियो भने १५ मिनेटमा गणना सकिएको थियो ।
सन् २०१८ मा चीनको संविधानमा परिवर्तन गरेर राष्ट्रपति बन्ने सीमा संशोधन भएसँगै सीलाई तेस्रो कार्यकालको लागि बाटो खुलेको थियो ।
राष्ट्रपतिमा पुनः निर्वाचित भएपछि सीले सोमबार संसद्को वार्षिक अधिवेशनमा सम्बोधन गर्ने भएका छन् ।
सन् २०१३ मा सी पहिलो पटक चीनको राष्ट्रपति बनेका थिए । त्यसपछि सन् २०१८ मा उनी दोस्रो कार्यकालको जिम्मेवारी समालेका थिए ।
आधुनिक चीनका पिता माओत्सेतुङपछि सी देशको सबैभन्दा शक्तिशाली नेता बनेका छन् ।
