अनलाइन डबली
काठमाडौँ । पाकिस्तानका पूर्वराष्टपति परवेज मुशर्रफको दुबईमा निधन भएको छ । दुबईको एक अस्पतालमा अमाइलोइडोसिस नामको रोगको उपचारको क्रममा उनको निधन भएको अन्तर्राष्ट्रिय संचारमाध्यमहरुले बताएका छन् ।
मुसर्रफ परिवारले ट्विटरमा जानकारी दिँदै अमाइलोइडोसिस नामको रोगबाट जुधिरहेका उनका सबै अंगले काम गर्न बन्द गरेको बताएका थिए ।
अमाइलोइडोसिस दुर्लभ र गम्भीर रोगको एक समूह भएको ब्रिटेनको नेशनल हेल्थ सर्भिसले बताएको बीबीसीले समाचारमा उल्लेख गरेको छ । यो रोगले मानिसको शरीरमा अमाइलोइड नामको असामान्य प्रोटिन उत्पादन गर्छ र यो मुटु, मिर्गौला, स्नायु प्रणाली, दिमाग आदि अंगमा जमा हुन थाल्छन् । जसका कारण यी अंगका तन्तुले राम्रोसँग काम छोड्छन् ।
मुशर्रफ शाहसी सैन्य कमाण्डर हुन् । २१ बर्षमा सेनामा भर्ति भएका मुशर्रफ सन् १९६५ मा भारतसँग बहादुरीपूर्वक लडेका थिए । उक्त युद्ध पाकिस्तानले हारेपनि मुशर्रफले भने बहादुरी साग लडेको भन्दै पाकिस्तानले पदक दिएको थियो ।
मुशर्रफले सन् १९७१ को युद्धमा पनि महत्वपूर्ण भूमिका खेलेका थिए । यो देखेर सरकारले उनलाई पटकपटक बढुवा गरेको थियो । परवेज मुशर्रफ सन् १९९८ मा जनरल बनेका थिए । आफ्नो जीवनी ‘इन द लाइन अफ फायर – ए मेमोयर’ मा जनरल मुशर्रफले कारगिल कब्जा गर्ने बाचा गरेको लेखेका छन् । तर नवाज सरिफका कारण उनले त्यसो गर्न सकेनन् ।
मुशर्रफ साहसी भएपनि महत्वकांक्षी र विश्वास घाती भएको बताइन्छ । सन् १९९८ मा तत्कालीन पाकिस्तानी प्रधानमन्त्री नवाज शरीफले परवेज मुशर्रफलाई विश्वास गर्दै पाकिस्तानी सेनाको प्रमुख बनाएका थिए । तर, मुशर्रफले विश्वास घात गर्दैै एक वर्षपछि नै १९९९ मा जनरल मुशर्रफले नवाज शरीफलाई सत्ताच्युत गरे र पाकिस्तानलाई कब्जामा लिए । नवाज सरिफले सत्ता सम्हाल्नेबित्तिकै परिवारसहित पाकिस्तान छोड्नुपरेको थियो ।
