काठमाडौं । राष्ट्रिय सहकारी बैँकको तरलता मंसिर माहिनामा ह्वात्तै बढेको छ । गत महिनाको तुलनामा मंसिर महिनाको तरलता झन्डै २० प्रतिशतले वृद्धि भएको छ ।
गत कात्तिकको तुलनामा मंसिरमा सहकारी बैंकको तरलता १९.८६ प्रतिशतले वृद्धि हुँदै ८ अर्ब ८ करोड १० लाख रुपैयाँ पुगेको हो । कात्तिकमा बैंकसँग ७ अर्ब ४८ करोड ६४ लाख तरलता रहेको थियो ।
यद्यपि, तरलतमा वृद्धि भएतापनि कात्तिकको तुलनामा बैंकको निक्षेप तथा कर्जा लगानी भने घट्न पुगेको छ ।
मंसिर महिनाको वित्तीय रिपोर्ट सार्वजनिक गर्दै बैंकले ४० अर्ब ६८ करोड १० लाख रुपैयाँ बचत संकलन गर्दै ३४ अर्ब ७९ करोड ४८ लाख रूपैयाँ कर्जा लगानी गरेको जनाएको छ । गत कात्तिकमा बैंकले ४० अर्ब ७० करोड ७९ लाख बचत संकलन गरी ३५ अर्ब १० करोड २२ लाख रुपैयाँ ऋण प्रवाह गरेको थियो ।
बैंकको बचत संकलन घट्न थालेपछि पछिल्लो समय नयाँ कर्जा प्रवाह बन्द गर्दै असुलीमा जोड दिएको छ । कर्जा लगानी घटाएर बचत र ऋण असुलीमा प्राथमिकता दिएसँगै सहकारी बैंकको तरलतामा सुधार आएको हो ।
