अनलाइन डबली
काठमाडौं । काभ्रेमा भएको बस दुर्घटनामा परी १८ जनाको ज्यान गएको छ । जिल्लाको बेथानचोक गाउँपालिका–४ चलाल गणेस्थानमा मंगलबार साँझ ६ बजे भएको दुर्घटना अन्य २२ जना घाइते भएका छन् ।
बर्तबन्ध सकेर फर्किएको बा ३ ख ४३८५ बस मंगलबार साँझ दुर्घटना भएको हो । दुर्घटनामा परी अन्य २२ जना घाइते भएका छन् ।
गाउँपालिकाका अध्यक्ष भगवान अधिकारीका अनुसार बसमा ३९ सवार थिए । मृतकमध्ये १३ जनाको दुर्घटनास्थल तथा अन्य पाँचको उपचारका क्रममा अस्पतालमा मृत्यु भएको थियो ।
बर्तबन्धको लागि रिजर्ब गरिएको बस बनेपा नगरपालिका–११ बाट बेथानचोक गाउँपालिका–५ स्थित च्याल्टी पुगेर फर्किएको थियो । घाइतेहरुको बनेपास्थित शिर मेमोरियल र धुलिखेल अस्पताल उपचार भइरहेको छ । केही घाइतेहरुको अवस्था गम्भीर रहेकोले काठमाडौं रिफर गरिएको छ ।
दुर्घटनापछि नेपाल प्रहरी र नेपाली सेना तथा स्थानीयले उद्धार कार्य गरिएको थियो । राति भएकोले कति जनाको ज्यान एकिन हुन सकेको छैन । अहिले घटनाको विस्तृत संकलन प्रहरीले गरिरहेको बताइएको छ ।
प्रत्यक्षदर्शीका अनुसार खचाखच भरिएको बस तीव्र गतिमा सडक मोडको भित्तामा ठोक्किएपछि सडकबाट केही तल खसेर दुर्घटना ग्रस्त भएको थियो ।
