अनलाइन डबली
काठमाडौं । सोमबार जाजरकोटमा जीप दुर्घटना हुँदा ११ जनाको ज्यान गएको छ । छेडागाड नगरपालिका- ५ मा भएको दुर्घटनामा ज्यान गुमाउने सबैको पहिचान खुलेको छ ।
दैलेखबाट छेडागाडमा बेहुली लिन जन्ती आएका थिए । माइती र जन्तीबीच विवाद हुँदा झडपको रुप लिएको थियो । उक्त झडपका घाइतेलाई उपचार लैजाँदै गर्दा जीप दुर्घटना भएको बताइएको छ ।
छेडागाड नगरपालिकाका उपप्रमुख चन्द्रबहादुर थापाका अनुसार जन्ती र माइती पक्षको झडपमा घाइतेलाई बोकेको कर्णाली प्रदेश ०२००१ च ०४२९ नम्बरको जीप दुर्घटना भएको हो । जीपमा सवार छेडागाड नगरपालिका वडा नम्बर ५ का जयकुमार बुढा, देवीसरा बुढा, रामबहादुर बुढा, दीपक अधिकारी, नैनसरा अधिकारी, अम्बर अधिकारी, निशा अधिकारी र वडा नम्बर ६ का वीरबहादुर खत्रीको घटनास्थलमै मृत्यु भएको छ ।
त्यसैगरी दैलेखको भगवतीमाई गाउँपालिका वडा नम्बर २ का जीपको चालक मानबहादुर राउत, वडा नम्बर ३ का वीरेन्द्र केसी र अम्बरबहादुर खड्काको पनि मृत्यु भएको प्रहरीले जनाएको छ । माइती र जन्तीबीचको झडपछि त्यहाँबाट भाग्न चाहनेहरु जीपमा कोचाकोच भरिएको बताइएको छ ।
दुर्घटनाका गम्भीर घाइते भएका जयनाथ अधिकारीको नेपालगंज उपचार भइरहेको छ । जीप मध्यपहाडी लोकमार्गमा भएको थियो ।
