अनलाइन डबली
काठमाडौं । प्रतिनिधिसभा सदस्य निर्वाचन अन्तरगत दोलखाको मत गणना अन्तिम चरणमा पुगेको छ । आइतबार रातिसम्मको मत परिणाम अनुसार नेकपा माओवादीा केन्द्रका गंगा कार्कीले अग्रता कायमै राखेका छन् । आइतबार दिउँसोबाट अग्रता लिएका कार्कीले रातिसम्म कायमै राखेका छन् ।
मत गणनाको सुरुदेखि अग्रता लिएका कार्कीले शनिबार राति भने पछि परेका थिए । आइतबार विहानबाट मतान्तर घटाएका कार्कीले दिउँसाेबाट नेकपा एमालेका बालकृष्ण शिवाकोटीलाई पछि पारेका थिए । आइतबार रातिसम्मको मत परिणाम अनुसार कार्कीले ३० हजार ७५५ मत पाएका थिए भने एमालेका शिवाकोटीले ३० हजार ४९२ मत सहित पछाइरहेका छन् । शिवाकाेटी २६३ मतले पछि परेका छन् ।
त्यसैगरी प्रदेशसभा दुबैको मत परिणाम आइसकेको छ । प्रदेशसभा क मा नेपाली काँग्रेसका कुन्दनराज काफ्ले विजयी भएका छन् । उनले २२ हजार ७९७ मत पाएका छन् भने एमालेका नरबहादुर श्रेष्ठले १४ हजार ७५५ मत पाएका छन् ।
त्यस्तै, प्रदेशसभा ख मा भने नेकपा एमालेका भरतबहादुर के.सी. विजयी भएका छन् । केसीले १९ हजार ४१४ मत ल्याएर विजयी हुँदा नेपाली काँग्रेसका वर्मा लामाले १७ हजार ५९५ मतमा सिमित भए ।
अब प्रतिनिधिसभाको मत गणना पनि अन्तिम चरणमा पुगेको बताइएको छ । कडा प्रतिस्पर्धामा रहेका कार्की र शिवाकोटी झिनो मतले विजयी हुने अवस्था देखिएको छ । एमाले र माओवादी नेताहरुले आ आफ्नो उम्मेदवारले जित्ने दाबी गरिरहेका छन् ।
