अनलाइन डबली
काठमाडौं । अछाम क्षेत्र नं.-२ को प्रदेशसभा क मा वाम लोकतान्त्रिक गठबन्धनकाे उम्मेदवार अक्कल बहादुर रावलकाे जित सुनिश्चित भएकाे छ । पछिल्लो मत परिणाम अनुसार रावलले ९ हजार ९८० मत प्राप्त गरेका छन् । नेकपा एमालेका भीम बहादुर विष्टले ७ हजार ४९७ मत ल्याएका छन् ।
अब गणना हुन बाँकी मत भन्दा रावलले धेरै अग्रता लिएसँगै जित सुनिश्चित भएकाे हाे । यो समाचार तयार पार्दासम्म रावलले २ हजार ४३० मतले अग्रता लिएका छन् । अब गणना हुन मत २ हजार भन्दा कम रहेको बताइएको छ ।
रावलको जित सुनिश्चित भएसँगै सुदूरपश्चिम प्रदेशमा माओवादीका ७ जना उम्मेदवार विजयी भएका छन् । दार्चुलाबाट मानबहादुर धामी, डोटीबाट शिब सिंह वली, कञ्चनपुरबाट ओम बिक्रम भाट, बझाङबाट भिम भण्डारी, अछामबाट झपड साउँद, डडेल्धुराबाट खगराज भट्ट र अछामबाट अक्कल बहादुर रावल रहेका छन् ।
यसैबीच गठबन्धनका उम्मेदवार प्रेमबहादुर आले डोटीबाट प्रतिनिधिसभा सदस्यमा निर्वाचित भएका छन् । नेकपा (एकीकृत समाजवादी) का नेता समेत रहेका आलेले ४ हजार २ सय ६ मतको अन्तर मत बनाउँदै विजय यात्रा समातेका छन् ।
बिहीबार बिहान सकिएको मतगणनामा एकीकृत समाजवादीका पोलिटब्यूरो सदस्य आले २७ हजार २ सय १० मत ल्याएर निर्वाचित भएको मुख्य निर्वाचन अधिकृतको कार्यालयले जानकारी दिएको छ । डोटीका मुख्य निर्वाचन अधिकृत शिवलाल पाण्डेयका अनुसार आलेले २७ हजार २ सय १० मत प्राप्त गर्दा एमाले उम्मेदवार गौरीकुमारी वलीले २३ हजार ४ मत प्राप्त गरेकी छन् ।
यो निर्वाचन क्षेत्रमा स्वतन्त्र उम्मेदवार तेस्रो स्थानमा रहेका थिए । नरेन्द्रबहादुर खड्काले ६ हजार ६ सय ८९ मत प्राप्त गरेका थिए । राप्रपाका अंकबहादुर खड्काले ८ सय २ मत प्राप्त गरेका थिए ।
डोटीबाट सुदूरपश्चिम प्रदेशसभामा एमाले र माओवादीका उम्मेदवार निर्वाचित भएका छन् । डोटी प्रदेश १ मा एमालेका चक्रबहादुर मल्ल र डोटी प्रदेशसभा निर्वाचन क्षेत्र नम्बर २ मा माओवादी केन्द्रका शिवसिं ओली निर्वाचित भएका हुन् ।
