काठमाडौं । सिन्धुपाल्चोक क्षेत्र नम्बर १ मा प्रतिनिधि सभा सदस्यका लागि माओवादी केन्द्रका युवा नेता माधवप्रसाद सापकोटा सुवोध विजयी भएका छन् । भरखरै सम्पन्न मत गणना अनुसार उनले निकटतम् प्रतिद्धन्दीका रुपमा नेकपा एमालेका नेता सुरेश नेपाललाई हराउँदै विजयी भएका हुन् ।
सार्वजनिक मत परिणाम अनुसार सापकोटाले ३० हजार ३७४ मत ल्याएर विजयी भएका हुन् । एमालेका नेपाल २७ हजार २१ मत मात्रै ल्याए । बाल्यकालबाटै जनयुद्धमा लागेका ४० वर्षीय सापकोटाको यो पहिलो चुनाव थियो ।
सिन्धुपाल्चाेक १ मा प्रतिनिधि सभा तर्फ ६९ हजार ५ सय ८८ खसेकाे थियाे । प्रदेश सभा १(१) मा ३३ हजार ८ सय ७१ र प्रदेश सभा १(२) ३५ हजार ७ सय १७ मत खसेकाे थियाे । सिन्धुपाल्चाेक क्षेत्र नं २ मा ७६ हजार ७ सय १६, प्रदेश सभा २(१) मा ३७ हजार ६ सय ३७ मत र प्रदेश सभा २(२) मा ३९ हजार ०७९ मत खसेकाे थियाे ।
मत गणनाको सुरुवाती चरणमा अग्रता लिएका नेपाल चौतारा साँगाचोकगढी क्षेत्रको गणना सुरु भएपछि पछि परेका थिए । सो नगरपालिका विजेता सापकोटाको जन्मस्थान हो । सो क्षेत्रमा यसअघि सभामुख अग्निप्रसाद सापकोटाले जितेका थिए ।
सत्तरुढ दलको गठबन्धनमा माओवादीको भागमा परेको सिन्धुपाल्चोक १ मा सभामुख सापकोटाले छोडेर युवा नेतृत्वका रुपमा माधव सापकोटालाई अघि सारेका हुन् । नेपाली काँग्रेसका मोहनबहादुर बस्नेतले समेत दावी गरेपनि उनलाई गठबन्धनले क्षेत्र नम्बर २ मा पठाएको थियो ।