अछाम । नेकपा (माओवादी केन्द्र)का केन्द्रीय सदस्य रामप्रसाद तिमिल्सिना ‘राप्ती’ ले अछाममा वाम लोकतान्त्रिक गठबन्धनको जित सुनिश्चित बन्दै गएको बताएका छन् । उनले जनयुद्ध, जनआन्दोलनका उपलब्धी विरुद्धमा नेकपा एमाले अध्यक्ष केपी शर्मा ओलीले चालेका कदमलाई जनताबीच पुर्याउँदा गठबन्धनको पक्षमा लहर बढ्दै गएको बताए ।
“ओलीको प्रतिगमन अपूर्त जस्तै थियो तर अहिले हामीले जनताको बीचमा पुर्याउँदा जनता एकहदसम्म स्पष्ट भएका छन् । यसले एमाले जनताबाट एक्लिदै गएको छ, यसले गठबन्धनको जितलाई सुनिश्चित बनाउँदै लगेको छ” राप्तीले अनलाइन डबलीसँग भने ।
अछाम क्षेत्र नं. २ को गठबन्धनको चुनावी प्रचारमा रहेका राप्तीले यो क्षेत्रमा एमालेभन्दा गठबन्धन झण्डै दश हजार मतले अगाडि रहेको समेत बताए ।
एमाले अध्यक्ष ओली जन्मजातै राजावादी रहेको बताउँदै त्यसको पुष्टि कमल थापासँगको गठबन्धनले पुष्टि गरेको समेत बताए । जनताले यसअघि अछामी जनताले मतदान गरेर कम्युनिस्टलाई दुई तिहाई बहुमतमा पुर्याउन योगदान गरेको तर ओलीकै कारण दुई तिहाईको सरकार ढलेको राप्तीले बताए ।
क्षेत्र नं. २ बाट गठबन्धनका उम्मेदवार पुष्पबहादुर शाह, प्रदेशसभा (क) का उम्मेदवार अक्कलबहादुर रावलसहित चुनावी अभियान टोली आज अछामको भुलु पुगेको छ । हिजो रहफमा चुनावी सभा गरेर आज भुलु पुगेको राप्तीले बताए । उनले गठबन्धनको पक्षमा जनता उत्साहित भएको समेत दाबी गरे ।