![](https://onlinedabali.com/wp-content/uploads/2022/09/uml-3-e1663380655652.jpg)
काठमाडौं । नेकपा (एमाले) का नेताहरुको मर्निङवाक सुरु भएको छ । एमालेले संविधान दिवसको अवसर पारेर आज बिहान काठमाण्डौमा वाकाथन अर्थात बिहानी पैदलयात्रा गरेको हो । काठमाडौंका विभिन्न स्थानबाट बसन्तपुर पुग्ने कार्यक्रम रहेको छ ।
असोज ३ गते संविधान दिवस पारेर एमालेले मर्निङवाक गरेको हो । निर्वाचन आयोगसँग सम्बन्धित अभियानहरुमा सहभागी हुनुपर्ने भएकाले एमालेले दुई दिन अगाडि नै आज मर्निङवाक कार्यक्रम राखेको बताइएको छ ।
बिहान ६ बजेर ४५ मिनेटदेखि सुरु हुने भनिएपनि ७ बजेपछि मात्रै नेताहरुले पैदत यात्रा सुरु गरेका छन् । ‘संविधानको सात वर्षे यात्रा, युवा सँगसँगै पदयात्रा’ नाम दिइएको कार्यक्रममा पार्टी अध्यक्ष केपी शर्मा ओली नयाँ बानेश्वरबाट पैदल यात्रा सुरु गरेका छन् । उनी हिँडेरै वसन्तपुर छन् ।
एमालेले आजको कार्यक्रममा झन्डा, ब्यानर नबोकी विशुद्ध मर्निङवाककै रुपमा काठमाण्डौका पाँच ठाउँबाट पैदलै वसन्तपुर डबली पुग्ने कार्यक्रम रहेको जनाएको छ । पैदल यात्रामा फरक फरक ठाउँमा फरक फरक नेताहरुले टोलीको नेतृत्व गरेका छन् । यात्रामा एमाले नेताहरुसँगै भातृ संगठनका युवा नेताहरु सहभागी छन् ।