अनलाइन डबली
काठमाडौँ । सरकारले कारवाही गर्ने तयारी गरेपछि वायु सेवा संचालक संघ आफूले घोषणा गरेका कार्यक्रमबाट पछि हटेको छ । संघले मंगलबार दिउँसो आजबाट सबै उडान बन्द गर्ने घोषणा गरेको थियो । संघको आन्दोलन घोषणासँगै नेपाल उड्ययन प्राधिकरणले पत्रकार सम्मेलन आयोजना गरेर वायु सेवा हडताल प्रतिबन्धित क्षेत्र भएको बताउँदै कारवाही गर्ने चेतावनी दिएको थियो ।
प्राधिरकणका महानिर्देशक प्रदीप अधिकारीले कसैको धाक र धम्की नचल्ने र सरकारले गरेको निर्णय कार्यान्वयन गर्ने बताएका थिए । संघका अध्यक्षलाई पक्राउ गर्ने तयारी भएपछि गएराति वार्ता भएको थियो । गृहमन्त्रालयको समन्वयमा भएको वार्तापछि संघले पूर्व घोषित सम्पूर्ण कार्यक्रम फिर्ता लिएको हो । त्यस्तै प्राधिकरणले गरेको निर्णयबारे छलफल गर्ने सहमति जनाएको थियो ।
गृह मन्त्रालयका सचिव टेकनारायण पाण्डेको समन्वयमा भएको वार्तामा सेवा संचालन गर्ने र छलफल र वार्ता जारी राख्ने सहमति भएको बताइएको छ । संघका प्रव्कता योगराज कँडेलका अनुसार ११ बजे मात्रै नियमित उडान हुनेछन् ।
नागरिक उड्डयन प्राधिकरणले विभिन्न कम्पनीका ५५ वटा जहाज र हेलिकप्टरहरू राती पार्किङ गर्न काठमाडौंबाहिर विमानस्थलमा लैजानुपर्ने निर्णय गरेको थियो । उक्त निर्णयसँगै संघ आन्दोलनमा उत्रिएको थियो । प्राधिकरणले कम्पनी विशेषलाई भन्दा पनि एयरपोर्टको सुरक्षाको लागि उक्त निर्णय गरेको जनाएको थियो ।
हवाइ क्षेत्रमा हडताल गर्न प्रतिबन्ध लगाइएको जानकारी हुँदाहुँदैँ पनि आन्दोलनका कार्यक्रम घोषणा गरेपछि संघको विरोध भइरहेको छ । उनिहरुलाई अनुकुल हुने गरी नियम बनाउन नसकिने प्राधिकरणका अधिकारीहरु बताउँछन् ।
