अनलाइन डबली
काठमाडौं । अछामको पञ्चदेवल विनायक नगरपालिका-४ का विनोद शाहीको न्यायको लागि काठमाडौंमा दीप प्रज्वलन गरिएको छ । शाहीको न्यायको लागि काठमाडौंमा गठन भएको संघर्ष समितिको आयोजनामा शुक्रबार साँझ काठमाडौंको माइतीघरमा दीप प्रज्वलन गरिएको हो ।
यसअघि संघर्ष समितिले घोषित कार्यक्रम अनुसार आज दीप प्रज्वलन गरिएको नेकपा एमालेका युवा नेता विरेन्द्र रावलले जानकारी दिए । उनका अनुसार घटनामा दोषीलाई कारवाही नभएसम्म संघर्षका कार्यक्रम जारी रहनेछन् ।
पत्रकार सम्मेलन गरेर संघर्षका कार्यक्रम सार्वजनिक गरिँदैछ । प्रहरीले किटानी जाहेरी नलिएको भन्दै आक्रोसित परिवार तथा आफन्तले काठमाडौंमा आज पत्रकार सम्मेलन गरी चरणवद्ध संघर्षका कार्यक्रम सार्वजनिक गर्दैछन् । प्रहरीले दोषीलाई पक्राउ गर्न तदारुकता नदेखाएको समेत बताए ।
बैशाख ३० गते मतदानको विषयलाई लिएर जेठ १६ गते नेपाली काँग्रेस र नेकपा एमालेका कार्यकर्ताबीच विवाद भएको थियो । १७ गते मध्यरात प्रहरी गाउँमा पसेर सर्वसाधारणलाई लछारपछार गरेसँगै विनोद हराएका थिए ।
जेठ २१ गते विनायक र कालिकास्थान सीमा नजिकै मध्यपहाडी राजमार्गबाट करिब ५ सय मिटर तल विनोदको शव भेटिएको थियो । काँग्रेस नेता कार्यकर्ताहरुले योजनावद्ध रुपमा विनोदको ह’त्या गरेको आरोप लागेको छ । विनोदको न्यायको लागि अछाममा पनि दिनदिनै विरोध प्रदर्शन जारी छन् । आज मात्रै विनायकबाट सदरमुकामसम्म मोटरसाइलक र्याली निकालिएको थियो ।
पञ्जदेवल विनायक नगरपालिकाकी मेयरसहितका नेपाली काँग्रेसका नेता कार्यकर्ताविरुद्ध किटानी जाहेरी दर्ता गरिएको छ । उनीहरुविरुद्ध पक्राउ पुर्जी समेत जारी गरिएको छ ।
तालिमप्राप्त कुकरसहित प्रहरीको टोली अछाम पुगेको थियो तर अहिलेसम्म शंकाको आधारमा पाँच समातिएको थियो । जसमध्ये तीन जनालाई प्रहरीले छोडेको छ ।
नेकपा एमाले, नेकपा माओवादी केन्द्रसहित चार कम्युनिस्ट पार्टीले संयुक्त विज्ञप्ति निकालेर पीडितलाई न्यायको लागि माग गरेका छन् । मंगलबार नेकपा एमालेका नगर इन्चार्ज भीमबहादुर विष्ट, नेकपा माओवादी केन्द्रका सहइन्चार्ज धर्मराज तिमिल्सैना, नेकपा एकीकृत समाजवादीका सहइन्चार्ज केशव शाही र विप्लव नेतृत्वको नेपाल कम्युनिस्ट पार्टीका इन्चार्ज सर्जन धामीले संयुक्त विज्ञप्ति निकालेका थिए ।
अछामका प्रहरी प्रमुख डिएसपी रविराज थपलिया पनि घटनामा दोषी भएको भन्दै उनको निलम्बन गर्न माग समेत उठेको छ । त्यस्तै, घटनामा जोडिएका प्रमुख जिल्ला अधिकारी विश्वराज मरासिनिले पनि दोषीलाई पक्राउ गर्न तदारुकता नदेखाएको भन्दै निलम्बन गर्न माग गरिएको छ ।
