अनलाइन डबलीकाठमाडौं । सरकारले कर फिर्ता लिएपनि नेपाल आयल निगमले पेट्रोलियम पदार्थको मूल्य फेरि बढाएको छ । गएरातिबाट लागु हुने गरी आयल निमगले नयाँ मूल्य लागु भएको निगमका सहप्रवक्ता पुष्कर कार्कीले विज्ञप्तिमार्फत जानकारी दिएका छन् ।
निगमले पेट्रोल, डिजल र मट्टीतेलको मृल्यवृद्धि गरेको छ । निगमले डिजल र पट्टीतेलको मूल्य अहिलेसम्मकै धेरै बढाएको हो । डिजल र मट्टीतेलको एकै पटक १२ रुपैयाँ बढाइएको छ भने पेट्रोलको ८ रुपैयाँ बढाइएको छ ।
‘अन्तराष्ट्रिय बजारमा उच्च दरले पेट्रोलियम पदार्थमा मूल्यवृद्धि भएको तथा इन्धन इन्डियन आयल कर्पोरेशनलाई भुक्तानी गर्नुपर्ने बक्यौता २० अर्ब रुपैयाँ पुगेको हुँदा निगम सञ्चालक समितिले मूल्य बढाउने निर्णय गरेको हो’ निगमले विज्ञप्तिमा भनिएको छ ।
अब नयाँ मूल्यअनुसार पेट्रोलको मूल्य प्रतिलिटर १ सय ७८, डिजल/मट्टीतेलको मूल्य प्रतिलिटर १ सय ६५ रुपैयाँ पुगेको छ । खाना पकाउने एलपी ग्यास र हवाई इन्धनको मूल्य भने यथावत् रहेको निगमले जनाएको छ ।
लगातार पेट्रोलिमय पदार्थको मूल्यवृद्धि हुन थालेपछि सडकमा विरोध प्रदर्शन हुन थालेपछि सरकारले १० रुपैयाँ विकास कर फिर्ता लिएको थियो । त्यसपछि निगमले पेट्रोल, मट्टीतेल र डिजलको मूल्य १० रुपैयाँ घटाएको थियो । त्यसको एक हप्ता नबित्दै निगमले पुनः मूल्यवृद्धि गरेको छ ।
